Варақаи иттилоотӣ
дар бораи фаъолияти Вазорати адлияи
Ҷумҳурии Тоҷикистон дар соли 2025-ум
Дар соли 2025-ум фаъолияти Вазорати адлияи Ҷумҳурии Тоҷикистон ва сохторҳои он дар партави сиёсат, дастуру супориш ва ҳидоятҳои Президенти Ҷумҳурии Тоҷикистон, Пешвои миллат, муҳтарам Эмомалӣ Раҳмон, инчунин супоришҳои Ҳукумати Ҷумҳурии Тоҷикистон ба роҳ монда шуда, тамоми чораҳо баҳри таҳияи санадҳои меъёрии ҳуқуқии ҷавобгӯй ба талаботи Конститутсияи Ҷумҳурии Тоҷикистон ва санадҳои ҳуқуқии байналмилалии эътирофнамудаи Тоҷикистон андешида шуданд.
Ба Вазорати адлия ва сохторҳои он 38 055 (дар соли 2024-ум 44 077) мавод вобаста ба масъалаҳои ҳуқуқӣ ворид гардид, ки нисбат ба ҳамин давраи соли 2024-ум - 6022 ё 14% мавод кам аст.
Дар самти қонунгузорӣ 4516 (дар соли 2024-ум 4240) мавод ворид шуд.
Аз шумораи умумии маводди воридшуда 1462 (соли 2024-ум 934) лоиҳаи санадҳои қонунгузорӣ ва зерқонунӣ мебошад, ки дар муқоиса бо ҳамин давраи соли 2024-ум 528 лоиҳа ва ё 57% зиёд мебошад. Аз ҷумла:
316 (соли 2024-ум 179) лоиҳаи қонунҳо, ки аз он 54-то (соли 2024-ум 45) бо ташаббуси вакилони Маҷлиси намояндагон ва аъзои Маҷлиси миллии Маҷлиси Олии Ҷумҳурии Тоҷикистон, 93 (соли 2024-ум 12) лоиҳа аз ҷониби Ҳукумати Ҷумҳурии Тоҷикистон ва 169 (соли 2024-ум 122) лоиҳа аз вазорату идораҳо;
78 (соли 2024-ум 44) лоиҳаи фармони Президенти Ҷумҳурии Тоҷикистон;
- 933 (соли 2024-ум 594) лоиҳаи қарори Ҳукумати Ҷумҳурии Тоҷикистон;
- 135 (соли 2024-ум 117) лоиҳаи фармоиши Ҳукумати Ҷумҳурии Тоҷикистон.
Ҳамаи лоиҳаи санадҳои воридшуда мавриди санҷиши ҳуқуқӣ қарор гирифта, дар самти мувофиқати онҳо ба меъёрҳои Конститутсия ва қонунҳои ҷумҳурӣ хулосаҳои дахлдор дода шуданд.
Дар соли 2025-ум кормандони Вазорат дар фаъолияти зиёда аз 300 гурӯҳи корӣ оид ба омода намудани лоиҳаҳои санадҳои қонунгузорӣ, лоиҳаҳои санадҳои зерқонунӣ ва дигар масъалаҳои ба қонунгузорӣ вобастабуда иштирок намуданд.
Вазорат ҷиҳати мутобиқнамоӣ ба талаботи Конститутсияи Ҷумҳурии Тоҷикистон ва қонунҳо бо мақсади бартараф намудани ихтилофу норасоиҳо дар санадҳои меъёрии ҳуқуқӣ 6 лоиҳаи қонун ва 9 лоиҳаи қарори Ҳукумати Ҷумҳурии Тоҷикистонро таҳия намуд.
Дар самти санҷиш, баҳисобгирӣ ва бақайдгирии давлатии санадҳои меъёрии ҳуқуқӣ дар соли 2025-ум ҳамагӣ 1384 (дар соли 2024-ум 1457) мавод ворид шуд, ки аз онҳо 995 (дар соли 2024-ум 1014) санади ҳуқуқӣ барои баҳисобгирии давлатӣ, 173 (дар соли 2024-ум 108) барои санҷиш ва бақайдгирии давлатӣ, 28 (дар соли 2024-ум 20) муроҷиати шахсони воқеӣ ва ҳуқуқӣ, 63 (дар соли 2024-ум 82) супориши Ҳукумат ва Дастгоҳи иҷроияи Президенти Ҷумҳурии Тоҷикистон 19 (дар соли 2024-ум 74) мавод барои иҷро ва 106 (дар соли 2024-ум 159) мавод барои маълумотро ташкил менамояд.
Дар давраи ҳисоботӣ 995 (дар соли 2024-ум 1014) санади ҳуқуқӣ, аз ҷумла 115 (дар соли 2024-ум 104) қонуни конститутсионӣ ва қонунҳои Ҷумҳурии
Тоҷикистон, 200 (дар соли 2024-ум 192) фармони Президенти Ҷумҳурии Тоҷикистон, 660 (дар соли 2024-ум 665) қарори Ҳукумати Ҷумҳурии Тоҷикистон, 20 (дар соли 2024-ум 48) қарори Маҷлиси намояндагони Маҷлиси Олии Ҷумҳурии Тоҷикистон барои баҳисобгирии давлатӣ ворид гардид, ки мутобиқи Таснифи ягонаи умумиҳуқуқии Ҷумҳурии Тоҷикистон гурўҳбандӣ ва ба онҳо варақаҳои баҳисобгирӣ тартиб дода шуда, ба махзани мутамаркази иттилооти ҳуқуқии (ММИҲ «Адлия») ва Феҳристи ягонаи давлатии санадҳои меъёрии ҳуқуқӣ (дар шакли коғазӣ ва электронӣ) дохил карда шуд.
Аз 173 (дар соли 2024-ум 108) санади барои санҷиш ва бақайдгирии давлатӣ воридгардида 111 (дар соли 2024-ум 71) санад ба қайд гирифта шуда, бақайдгирии 53-тои (дар соли 2024-ум 28) он бинобар ба қонунгузории амалкунанда мухолифат доштан рад карда шуда, 9 санади боқимонда мавриди баррасӣ қарор дорад.
Аз шумораи зикршуда дар 35 (дар соли 2024-ум 21) санад омилҳои бавуҷудоварандаи коррупсия ошкор шудааст.
Дар самти баррасии санадҳои ҳуқуқии байналмилалӣ мутахассисони Вазорат дар давраи ҳисоботӣ 2562 (соли 2024–ум 2308) маводро мавриди баррасӣ қарор дода, нисбати онҳо хулосаҳои дахлдор пешниҳод намуданд.
Аз ин шумора 567 (соли 2024–ум 548) лоиҳаи шартномаҳои байналмилалӣ, 13 (соли 2024-ум 24) лоиҳаи амрҳо ва фармонҳои Президенти Ҷумҳурии Тоҷикистон, 147 (соли 2024-ум 124) лоиҳаи қарорҳои Ҳукумати Ҷумҳурии Тоҷикистон, 30 (соли 2024-ум 32) лоиҳаи қарорҳои Маҷлиси намояндагони Маҷлиси Олии Ҷумҳурии Тоҷикистон, 1757 (соли 2024-ум 1550) дархости
вазорату идораҳо ва сохторҳои зертобеи Вазорат ва 32 дархости созмонҳои байналмилалӣ мебошанд.
4-уми ноябри соли 2025-ум бо ташаббуси Вазорати адлия Форуми ёздаҳуми миллӣ оид ба волоияти қонун дар Тоҷикистон баргузор гардид. Дар форум намояндагони Дастгоҳи иҷроияи Президенти Ҷумҳурии Тоҷикистон, Маҷлиси миллӣ ва Маҷлиси намояндагони Маҷлиси Олӣ, роҳбарон ва намояндагони вазорату идораҳо, созмонҳои байналмилалии муқими Тоҷикистон, коршиносони мустақил, ҷомеаи шаҳрвандӣ, шарикони рушд ва ҳамчунин намояндагони вазоратҳои адлия аз Федератсияи Россия, ҷумҳуриҳои Қирғизистон, Ӯзбекистон, Озарбойҷон ва Туркманистон ширкат варзиданд.
Аз тарафи кормандони Вазорати адлия ва сохторҳои зертобеи он дар соли 2025-ум 14 078 кори тарғибу ташвиқ гузаронида шуд. Аз ҷумла 10 955 вохӯрию суҳбат, тавассути телевизион ва радио 2125 баромаду суҳбат гузаронида шуда, дар рўзномаҳои ҷумҳуриявӣ 998 мақола ба нашр расид.
Дар самти бақайдгирии ташкилотҳои адвокатӣ дар соли 2025-ум дар асоси Қонуни Ҷумҳурии Тоҷикистон «Дар бораи адвокатура ва фаъолияти адвокатӣ» дар шаҳри Душанбе 13 кабинети адвокатӣ, дар вилояти Суғд 11 кабинети адвокатӣ, дар вилояти Хатлон 4 кабинети адвокатӣ ва дар шаҳру ноҳияҳои тобеи ҷумҳурӣ 2 кабинети адвокатӣ ба қайд гирифта шуданд.
Барои амалиётҳои нотариалии баҷоовардашуда аз тарафи нотариусони давлатӣ 152 294 824 (соли 2024-ум 126 251 219,60) сомонӣ боҷи давлатӣ ситонида шуд, ки нисбат ба соли 2024-ум 26 043 604,40 сомонӣ ё 21% зиёд мебошад.
Аз тарафи мақомоти сабти асноди ҳолати шаҳрвандӣ дар давраи ҳисоботӣ 502 366 (дар соли 2024-ум 489 896) сабт ба қайд гирифта шуд, ки нисбат ба ҳамин давраи соли 2024-ум 12 470-то ё 3% зиёд мебошад.
Аз фаъолияти мақомоти сабти асноди ҳолати шаҳрвандӣ дар давраи ҳисоботӣ ба буҷети ҷумҳурӣ 26 006 821 (соли 2024-ум 23 975 076) сомонӣ боҷи давлатӣ ворид гардид, ки ин нисбат ба ҳамин давраи соли гузашта 2 031 745 сомонӣ ё 8% зиёд мебошад.
Дар самти бақайдгирии иттиҳодияҳои ҷамъиятӣ дар давраи ҳисоботӣ 238 (дар соли 2024-ум 313) ариза дар бораи бақайдгирии иттиҳодияҳои ҷамъиятӣ, қайди баҳисобгирии филиалу намояндагиҳо ва барҳамдиҳӣ ворид гардид.
Дар соли 2025-ум 1595 огоҳиномаи ташкилотҳои ҷамъиятӣ вобаста ба қабул намудани грантҳо ва кумак аз давлатҳои хориҷӣ ба Вазорат пешниҳод гардид.
Ба Вазорат 1102 (соли 2024-ум 1159) иттиҳодияи ҷамъиятӣ дар бораи идомаи фаъолияти худ бо нишон додани маҳалли ҷойгиршавии мақомоти доимоамалкунандаи роҳбарикунанда ҳисобот пешниҳод намуданд.
Ба шуъбаи апостилгузорӣ ба ҳуҷҷатҳои расмии давлатӣ дар соли 2025-ум 4382 (дар соли 2024-ум 3844) ариза барои гузоштани апостил пешниҳод гардида, ба 7499 ҳуҷҷат (дар соли 2024-ум 6069) апостил дода шуд.
Дар соли 2025-ум Феҳристи ягонаи давлатии уҳдадориҳои таъминшуда 947 (дар соли 2024-ум 360) огоҳиномаи гаравии молу мулки манқул аз ҷониби ташкилотҳои қарзӣ ба қайд гирифта шуд.
Дар самти баланд бардоштани савияи донишҳои ҳуқуқӣ ва омодагии касбии мутахассисони Вазорати
адлия ва сохторҳои он, инчунин хадамотҳои ҳуқуқии корхонаҳо, муассисаҳо ва ташкилотҳои ҷумҳурӣ дар давраи ҳисоботӣ 17 курси такмили ихтисос бо ҷалби 305 корманди мақомоти сабти асноди ҳолати шаҳрвандӣ, идораҳои нотариалии давлатӣ, Муассисаи давлатии «Маркази ёрии ҳуқуқӣ», Маркази ҷумҳуриявии экспертизаи судӣ ва криминалистӣ, Сарраёсати иҷрои ҷазои ҷиноятӣ, 20 хониши идоравӣ бо ҷалби кормандони Дастгоҳи марказӣ Вазорат ва сохторҳои он, 127 вохӯрӣ бо ҷалби 8543 нафар вобаста ба шарҳи меъёрҳои Конститутсияи Ҷумҳурии Тоҷикистон, нишондодҳои паёми Президенти Ҷумҳурии Тоҷикистон «Дар бораи самтҳои асосии сиёсати дохилӣ ва хориҷии ҷумҳурӣ», истифодаи ғайриқонунии неруи барқ ва мавзуъҳои дигари марбут ба баланд бардоштани донишҳои ҳуқуқии шаҳрвандон, 3 конференсияи илмию назариявӣ ва илмию амалӣ, 3 мизи мудаввар, 162 баромади телевизионӣ ва радиоӣ дар телевизиони «Тоҷикистон», «Ҷаҳоннамо», «Сафина», «Душанбе», «Илм ва табиат», «Хатлон», нашри 2 дастури таълимӣ ва 80 мақола дар рўзномаҳои ҷумҳуриявӣ ба нашр расид.
Дар соли 2025-ум барои гузаронидани экспертизаи судӣ ва криминалистӣ аз тарафи мақомоти таҳқиқ ва тафтишоти пешакӣ, суд, прокуратура, Кумитаи давлатии амнияти миллӣ, Агентии назорати давлатии молиявӣ ва мубориза бо коррупсия, инчунин шахсони воқеӣ ва ҳуқуқӣ 6230 мавод ворид гардид.
Ҳуқуқшиносони давлатии Муассисаи давлатии «Маркази ёрии ҳуқуқӣ» дар соли 2025-ум ба 12 016 шаҳрванд (дар соли 2024-ум 11 841) машварати ҳуқуқӣ пешкаш намуданд. Аз ин шумора 7710 (64%) нафар зан ва
4306 (36%) нафарро мардҳо ташкил дода, аз шумораи умумӣ 333 нафарашон шахсони маъюб мебошанд.
Ба маркази ҳамоҳангсозии Муассисаи мазкур (колл-сентр) 471 дархост оид ба парвандаҳои ҷиноятӣ ба барномаи худкори иттилоотии “Адвокат” ворид гардид, ки аз ин шумора 440 (93%) мард, 31 (7%) зан ва аз шумораи умумӣ 45 нафар ноболиғ ва 8 нафарашон шахсони маъюб мебошанд.
Дар давраи ҳисоботӣ ба Вазорат 10 038 (дар соли 2024-ум 10 968) муроҷиати шахсони воқеӣ ва ҳуқуқӣ ворид гардид, ки ба ҳамаи онҳо дар муҳлатҳои муқарраргардида ҷавобҳои дахлдор дода шуд.
Аз ҷумла 93 (соли 2024-ум 80) муроҷиати шахсони воқеӣ ва ҳуқуқӣ тавассути Маҷлиси Олии Ҷумҳурии Тоҷикистон ва Дастгоҳи иҷроияи Президенти Ҷумҳурии Тоҷикистон, 633 (соли 2024-ум 608) муроҷиати хаттии шахсони воқеӣ, 362 (соли 2024-ум 328) муроҷиати хаттии шахсони ҳуқуқӣ, 3822 огоҳиномаҳои ташкилотҳои ҷамъиятӣ (соли 2024-ум 2811), 42 (соли 2024-ум 42) муроҷиати электронӣ, 4860 (соли 2024-ум 6199) муроҷиати шаҳрвандон аз хориҷи кишвар, 75 (соли 2024-ум 717) ҳуҷҷат оид ба гирифтани нусха ё дубликати амалиётҳои нотариалӣ, 151 (соли 2024-ум 183) ҳуҷҷат оид ба бақайдгирӣ ё барҳамдиҳии ташкилотҳои ҷамъиятӣ ва ҳизбҳои сиёсӣ мебошад.
Дар соли 2025-ум дар рӯзҳои қабул аз ҷониби роҳбарияти Вазорат 181 шаҳрванд қабул карда шуда, муроҷиатҳои онҳо баррасӣ гардиданд.