16 ноябри соли 2026, дар Рӯзи Президенти Ҷумҳурии Тоҷикистон, дар шаҳри Пекин Донишкадаи такмили ихтисоси Вазорати адлияи Ҷумҳурии Тоҷикистон ва Донишгоҳи илмҳои сиёсатшиносӣ ва ҳуқуқи Чин Созишномаи ҳамкорӣ ба имзо расониданд. Дар маросим ректори Донишкада, номзади илмҳои ҳуқуқшиносӣ Собирзода Исфандиёр Салом суханронӣ намуда, самтҳои афзалиятноки ҳамкории ду муассисаро дар соҳаи таҳсилоти ҳуқуқӣ ва такмили ихтисоси кадрҳо баён кард.
Дар Рӯзи Президенти Ҷумҳурии Тоҷикистон ба имзо расидани Созишнома аҳаммияти хоси рамзӣ дорад. Густариши робитаҳои илмию таълимӣ бо муассисаҳои бонуфузи хориҷӣ аз самараҳои сиёсати «дарҳои кушода»-и Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон мебошад. Имзои ин санад дар чунин рӯзи фархунда ифодаи амалии дӯстии Тоҷикистону Чин буда, барои он замина мегузорад, ки омӯзгорон ва мутахассисони соҳаи ҳуқуқи ду кишвар аз донишу таҷрибаи ҳамдигар баҳра баранд.
Дар мулоқот бо ноиби президенти Донишгоҳи илмҳои сиёсатшиносӣ ва ҳуқуқи Чин Юй Фэй, намояндагони роҳбарият ва ҳайати профессорону омӯзгорони Донишгоҳ масъалаҳои ташкили курсҳои такмили ихтисос, табодули таҷрибаи омӯзгорӣ ва такмили усулҳои расонидани кумаки методӣ баррасӣ гардиданд.
Ректори Донишкада ҷиҳати татбиқи амалии Созишнома се пешниҳоди мушаххас ба миён гузошт.
Якум, ба роҳ мондани ҳамкорӣ дар соҳаи экспертизаи судӣ ва криминалистика бо ҷалби мутахассисони Маркази ҷумҳуриявии экспертизаи судӣ ва криминалистии Вазорати адлияи Ҷумҳурии Тоҷикистон. Машғулиятҳои муштарак ба коршиносони ду кишвар имкон медиҳанд, ки бо усулҳои гузаронидани экспертизаи судӣ шинос шаванд ва таҷрибаи касбии худро мубодила намоянд.
Дуюм, омӯзиши таҷрибаи Чин дар ташкили низоми ёрии ҳуқуқии ройгон ба аҳолӣ ва омода намудани ҳуқуқшиносоне, ки ба шаҳрвандон машварат медиҳанд. Пешниҳод шуд, ки дар ин самт таҷриба ва ниёзҳои амалии Муассисаи давлатии «Маркази ёрии ҳуқуқӣ»-и Вазорати адлияи Ҷумҳурии Тоҷикистон ба назар гирифта шаванд.
Сеюм, густариши робитаҳои илмӣ тавассути пешниҳоди мақолаҳои олимону омӯзгорони ҳар ду муассиса барои нашр дар маҷаллаи сиёсиву ҳуқуқии «Ҳаёт ва қонун»-и Вазорати адлияи Ҷумҳурии Тоҷикистон ва маҷаллаҳои илмии Донишгоҳи илмҳои сиёсатшиносӣ ва ҳуқуқи Чин. Ин иқдом барои муаррифии натиҷаҳои таҳқиқоти ҳуқуқшиносони тоҷик дар Чин ва шиносоии хонандагони тоҷик бо осори илмии ҳамтоёни чинӣ имконият фароҳам меорад.
Ҷониби Чин пешниҳодҳои ректори Донишкадаро мусбат арзёбӣ намуда, омодагии худро барои таҳкими робитаҳои илмию таълимӣ ва татбиқи Созишнома изҳор дошт. Интизор меравад, ки ҳамкории ду муассиса ба такмили маҳорати касбии мутахассисони мақомоти адлия ва ғанӣ гардидани муҳтавои барномаҳои таълимӣ мусоидат намояд.