16 ноябри соли 2026 дар Донишгоҳи илмҳои сиёсӣ ва ҳуқуқи Чин дар шаҳри Пекин конфронси байналмилалии илмию амалӣ оид ба рушди қонунгузорӣ, низоми меъёрҳои ҳуқуқӣ ва таҷрибаи муосири давлатдорӣ баргузор гардид.
Дар конфронс ректори Донишкадаи такмили ихтисоси Вазорати адлияи Ҷумҳурии Тоҷикистон Собирзода Исфандиёр Салом дар мавзуи «Рушди қонунгузории Ҷумҳурии Тоҷикистон ва Ҷумҳурии Мардумии Чин аз нигоҳи ҳуқуқи муқоисавӣ» маърӯза намуд.
Собирзода Исфандиёр Салом зимни муаррифии таҷрибаи Тоҷикистон таъкид намуд, ки дар солҳои истиқлоли давлатӣ қабули Конститутсия барои ташаккули низоми қонунгузории миллӣ замина гузошт. Ӯ нақши Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмонро дар ин раванд шарҳ дода, зикр намуд, ки барқарор гардидани сулҳ ва таҳкими ваҳдати миллӣ барои идомаи ислоҳоти ҳуқуқӣ шароити мусоид фароҳам овард. Дар марҳилаҳои минбаъда такмили қонунгузорӣ ба ҳифзи ҳуқуқу озодиҳои инсон ва шаҳрванд, танзими муносибатҳои иқтисодӣ ва таъмини волоияти қонун равона гардид.
Дар бахши муқоисавии маърӯза ректори Донишкада ба масъалае таваҷҷуҳ намуд, ки барои ҳар ду кишвар аҳаммият дорад. Ҳангоми таҳияи қонунҳо чӣ гуна метавон аз таҷрибаи кишварҳои дигар истифода бурд ва ҳамзамон анъанаҳои ҳуқуқӣ ва ниёзҳои ҷомеаи худро ба назар гирифт? Ӯ дар ин замина ба таҷрибаи Ҷумҳурии Мардумии Чин дар такмили қонунгузорӣ ва ба ҷойгоҳи ин масъала дар сиёсати давлатдории Раиси Ҷумҳурии Мардумии Чин муҳтарам Си Ҷинпин ишора намуд. Ба таъкиди маърӯзачӣ, ҳангоми муқоисаи таҷрибаи ду кишвар омӯзиши тарзи татбиқи қонунҳо низ муҳим аст. Маҳз дар амал муайян мегардад, ки меъёри ҳуқуқӣ то чӣ андоза ба ҳалли масъалаҳои шаҳрвандон мусоидат мекунад.
Собирзода Исфандиёр Салом ҳамчунин зикр намуд, ки баргузории конфронс дар шаҳри Пекин ба Рӯзи Президенти Ҷумҳурии Тоҷикистон рост омадааст. Ба ин муносибат ӯ Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ва мардуми шарифи Тоҷикистонро табрику таҳният гуфта, саҳми таърихии Пешвои миллатро дар бунёди давлати ҳуқуқбунёд ва таҳкими пояҳои давлатдории миллӣ таъкид намуд.
Дар фарҷоми маърӯза ректори Донишкада ба рушди муносибатҳои дӯстона ва шарикии стратегии ҳамаҷонибаи Тоҷикистону Чин баҳои баланд дода, омӯзиши муштараки таҷрибаи қонунгузорӣ ва табодули афкор миёни ҳуқуқшиносони ду кишварро аз самтҳои муҳими ҳамкории минбаъдаи илмӣ донист.