29-уми октябри соли равон вазири адлияи Ҷумҳурии Тоҷикистон Музаффар Ашуриён дар Машварати дувоздаҳуми вазирони адлияи давлатҳои узви Созмони ҳамкории Шанхай, ки таҳти раёсати Вазорати адлияи Федератсияи Русия дар шакли маҷозӣ баргузор гардид, иштирок намуд.
Дар машварати мазкур вазирони адлияи ҷумҳуриҳои Қазоқистон, Қирғизистон, Ҳиндустон, Узбекистон, Беларус, Ҷумҳурии Исломии Эрон, Федератсияи Русия, Ҷумҳурии Исломии Покистон ва муовини Дабири кулли Созмони ҳамкории Шанхай иштирок намуданд.
Дар ҷараёни машварат масъалаҳои навгониҳо дар фаъолияти вазоратҳои адлияи кишварҳои узви Созмони ҳамкориҳои Шанхай, самтҳои афзалиятноки ҳамкории давлатҳои узви Созмони ҳамкории Шанхай дар соҳаи ҳуқуқ ва адолат, рақамикунонии фаъолияти вазоратҳои адлияи кишварҳои узви Созмони ҳамкории Шанхай мавриди муҳокима қарор гирифт. Дар натиҷаи машварати мазкур Эъломия ба имзо расонида шуд.
Ҳамзамон иттилоъ дода шуд, ки машварати навбатӣ дар Ҷумҳурии Тоҷикистон баргузор хоҳад гашт.