23 июли соли 2026 таҳти раёсати Раиси Кумитаи ҳифзи муҳити зисти назди Ҳукумати Ҷумҳурии Тоҷикистон Баҳодур Шерализода бо мақсади таҳияи "Стратегияи идоракунии партовҳои сахти маишӣ дар Ҷумҳурии Тоҷикистон барои давраи то соли 2040" ва муаррифии "Маркази минтақавии идоракунии партовҳо дар шаҳри Душанбе" ҷаласаи корӣ баргузор гардид.
Дар кори ҷаласа Роҳбари намояндагии Бонки Осиёии Рушд дар Тоҷикистон ҷаноби Ко Сакамото, намояндагони Бонки аврупоии таҷдид ва рушд, Барномаи рушди Созмони Милали Муттаҳид, Бонки ҷаҳонӣ, Агентии ҳамкории байналмилалии Ҷопон дар Тоҷикистон, роҳбарияти Кумитаи хоҷагии манзилию коммуналӣ, Кумитаи давлатии сармоягузорӣ ва идораи амволи давлатӣ ва Мақомоти иҷроияи ҳокимияти давлатии шаҳри Душанбе иштирок намуданд.
Зимни баромади хеш Раиси Кумитаи ҳифзи муҳити зисти назди Ҳукумати Ҷумҳурии Тоҷикистон Баҳодур Шерализода иброз дошт, ки Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ҳанӯз 17 сентябри соли 2025 зимни вохӯрӣ бо роҳбарону кормандони Кумитаи ҳифзи муҳити зист баён намуданд, ки сохтмони корхонаҳои маҷмуии коркарди партовҳо дар шаҳру ноҳияҳои мамлакат бо ҷалби сармояи ватанию хориҷӣ бо назардошти таҷрибаи пешқадам ва пешниҳоди имтиёзҳо барои онҳо метавонад ба коҳишёбии партовҳо таъсири мусбат расонад. Набояд фаромӯш кард, ки ин кор аз лиҳози иқтисодию иҷтимоӣ ва экологӣ барои мамлакат манфиати зиёд дорад.
Қайд гардид, ки танҳо дар соли 2025 дар Тоҷикистон тақрибан 1,6 миллион метри мукааб партов ба вуҷуд омадааст, ки ба ҳар сари аҳолӣ тақрибан 150 килограмм рост меояд ва ин нишондиҳанда сол то сол афзоиш меёбад.
Ҳамчунин, масъулони сатҳи баланд аз қароргоҳи маркази Бонки Осиёии Рушд дар шаҳри Манилаи Ҷумҳурии Филиппин хонум Ҷингмин Ҳуанг, Директори департаменти оби ошомиданӣ ва рушди шаҳрҳо ҷаноби Норио Саито, Директори калони сектори оби ошомиданӣ ва рушди шаҳрҳои Бонки Осиёии Рушд ва намояндаи Вазорати ҳифзи муҳити зист ва тағйирёбии иқлими Ҷопон ба таври онлайнӣ ширкат варзиданд.
Сипас аз ҷониби масъулини Кумитаи ҳифзи муҳити зисти назди Ҳукумати Ҷумҳурии Тоҷикистон "Стратегияи идоракунии партовҳои сахти маишӣ дар Ҷумҳурии Тоҷикистон барои давраи то соли 2040" ва "Маркази минтақавии идоракунии партовҳо дар шаҳри Душанбе" муаррифӣ гардид.
Гуфта шуд, ки қабули Стратегияи мазкур ӯҳдадориҳои байналмилалии Тоҷикистонро ҷиҳати иҷрои Конвенсияҳои Базел, Стокголм, Роттердам ва Созишномаи Париж мутобиқ буда, он баҳри амалишавии Ҳадафҳои Рушди Устувор оид ба шаҳрҳои устувор, мубориза бо тағйирёбии иқлим равона гардидааст.
Маҳз бо ин мақсад Кумитаи ҳифзи муҳити зист, таҳти роҳбарии Ҳукумати Ҷумҳурии Тоҷикистон, “Стратегияи идоракунии партовҳо дар Ҷумҳурии Тоҷикистон барои то соли 2040”-ро, ҳамроҳ бо Нақшаи чорабиниҳои солҳои 2026-2030, таҳия намуд. Ин Стратегия моро уҳдадор месозад, ки заминаи ҳуқуқиро мутобиқ ба принсипҳои иқтисоди даврӣ ва масъулияти васеи истеҳсолкунанда навсозӣ намоем; инфрасохторро аз партовгоҳҳои санитарӣ то ҳалли табдили партов ба энергия навсозӣ кунем; идоракунии бехатари партовҳои хатарнок, тиббӣ, электронӣ ва сохтмониро тақвият диҳем; шаффофият ва мониторинги рақамиро ҷорӣ намоем.
Пас аз муҳокимаи масъала иштирокчиён вобаста ба атрофи мусоидат баҳри татбиқи ин силсилаи ташаббусҳо, ҳамкории нишодҳои дахлдор бо Кумитаи ҳифзи муҳити зист баҳри ба даст овардани натиҷаи мушаххас табодули афкор сурат гирифт.