Дар доираи баргузории чорабиниҳои Конфронси 31-уми тарафҳои Конвенсияи қолабии Созмони Милали Муттаҳид оид ба тағйирёбии иқлим (COP31), ки дар шаҳри Анталияи Ҷумҳурии Туркия баргузор мегардад, намояндаи Ҳукумати Ҷумҳурии Тоҷикистон, муовини Сарвазири мамлакат Зиёзода Сулаймон аз павилонҳои миллии кишварҳои Осиёи Марказӣ боздид ба амал овард.
Зимни боздид намояндаи Ҳукумати Ҷумҳурии Тоҷикистон бо дастовардҳо, ташаббусҳо ва самтҳои афзалиятноки фаъолияти кишварҳои минтақа дар соҳаи ҳифзи муҳити зист, мутобиқшавӣ ба тағйирёбии иқлим, истифодаи оқилонаи захираҳои табиӣ ва таъмини рушди устувор шинос гардид.
Ҳамзамон, ба масъалаҳои таҳкими ҳамкориҳои минтақавӣ, табодули таҷриба ва дониш, татбиқи ташаббусҳои муштарак ва густариши шарикии байналмилалӣ дар самти муқовимат ба тағйирёбии иқлим таваҷҷуҳи махсус зоҳир карда шуд.
Боздиди мазкур барои шиносоӣ бо таҷрибаи пешқадами кишварҳои минтақа, табодули афкор ва баррасии имкониятҳои нави ҳамкорӣ дар самти ҳалли мушкилоти экологӣ ва иқлимӣ заминаи мусоид фароҳам овард.
Ҷумҳурии Тоҷикистон бо дарназардошти осебпазирии минтақаҳои кӯҳистон ба оқибатҳои тағйирёбии иқлим пайваста ҷонибдори таҳкими ҳамкориҳои минтақавию байналмилалӣ, муттаҳид намудани талошҳои кишварҳо ва пешбурди ташаббусҳои муштарак дар самти ҳифзи муҳити зист ва таъмини амнияти иқлимӣ мебошад.
Чунин иқдомҳо дар таҳкими муносибатҳои дӯстона, густариши муколамаи созанда ва рушди ҳамкориҳои судманд миёни кишварҳои Осиёи Марказӣ нақши муҳим доранд.