20 сентябри соли 2026 дар доираи сафари кории Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба вилояти Суғд, дар шаҳри Хуҷанд бахшида ба ҷашни 35-солагии Истиқлоли давлатии Ҷумҳурии Тоҷикистон бинои Маркази ташхис, таҳлил ва мониторинги экологии Сарраёсати ҳифзи муҳити зист дар вилояти Суғд ифтитоҳ гардид.
Дар маросими ифтитоҳи он Раиси Кумитаи ҳифзи муҳити зисти назди Ҳукумати Ҷумҳурии Тоҷикистон Баҳодур Шерализода, Раиси шаҳри Хуҷанд Фирдавс Шарифзода ва муовини Раиси вилояти Суғд Файзулло Қосимӣ иштирок намуданд.
Дар рафти шиносоӣ бо шароити кории марказ иттилоъ дода шуд, ки бо фароҳам овардани шароити мусоиди корӣ ва муҷаҳҳаз намудани марказ бо таҷҳизоти зарурӣ сифати гузаронидани ташхис ва мониторинги экологӣ боз ҳам беҳтар мегардад.
Майдони умумии бино зиёда аз 500 метри мураббаъ буда, он аз се ошёна ва 14 утоқи корӣ иборат аст. Дар ошёнаи якум ташхисгоҳ ва утоқҳои кории шуъбаи мониторинги экологӣ, таҳлилӣ ва ахбору иттилооти Сарраёсат бо таҷҳизоти зарурӣ ҷойгир карда шудаанд. Дар ташхисгоҳ барои гузаронидани ташхиси таркиби обҳои рӯизаминӣ ва зеризаминӣ, партовобҳо, хок, ҳавои атмосфера ва ченкунии дараҷаи радиатсия таҷҳизоти зарурӣ насб гардида, инчунин утоқҳои корӣ барои мутахассисон-таҳлилгарон мавҷуданд.
Дар ошёнаи дуюм утоқҳои корӣ бо лавозимоти зарурӣ барои фаъолияти мутахассисон ва нозирони давлатӣ муҷаҳҳаз гардидаанд. Дар ошёнаи сеюм қабулгоҳ ва маҷлисгоҳи замонавӣ ҷойгир мебошанд. Дар бино ҳамагӣ 5 нуқтаи санитарию гигиенӣ мавҷуд аст. Ҳамчунин, саҳни назди бино кабудизор ва гулзор карда шудааст.
Пас аз шиносоӣ бо иншооти навбунёд дар толори Сарраёсати ҳифзи муҳити зисти вилояти Суғд бо иштироки меҳмонон ҷамъомад баргузор гардид. Раиси Кумитаи ҳифзи муҳити зисти назди Ҳукумати Ҷумҳурии Тоҷикистон Баҳодур Шерализода, Раиси шаҳри Хуҷанд Фирдавс Шарифзода ва муовини Раиси вилояти Суғд Файзулло Қосимӣ ба сифати корҳои анҷомёфта баҳои баланд доданд. Ба як қатор кормандони ҶДММ «Сомониён Сохтмон» Сипосномаҳои Раиси Кумитаи ҳифзи муҳити зист супорида шуданд.