Дар дораи баргузории Конфронси 31-уми тарафҳои Конвенсияи қолабии СММ оид ба тағйирёбии иқлим (COP31) дар шаҳри Анталияи Ҷумҳурии Туркия Раиси Кумитаи ҳифзи муҳити зисти назди Ҳукумати Ҷумҳурии Тоҷикистон Баҳодур Шерализода дар чорабинӣ таҳти унвони "Роҳҳои ҳалли устуворӣ", ки аз ҷониби Павилиони миллии Ҷумҳурии Италия ташкил карда шуд, иштирок ва суханронӣ намуд.
Баҳодур Шерализода дар суханронии худ ба аҳамияти тақвияти ҳамкории байналмилалӣ, ҷалби сармоягузорӣ, ҷорӣ кардани технологияҳои инноватсионӣ ва муттаҳид кардани талошҳои мақомоти давлатӣ, муассисаҳои молиявии байналмилалӣ ва бахши хусусӣ барои суръат бахшидан ба татбиқи ҳадафҳои рушди устувор таъкид кард.
Таваҷҷуҳи махсус ба афзалиятҳои экологӣ дар Тоҷикистон зоҳир карда шуда,гуфта шуд, ки тақрибан 93 фоизи қаламрави кишвар кӯҳсор аст ва пиряхҳо ба экосистемаҳои кӯҳӣ барои ҳамкории минтақавии обӣ, ҳифзи гуногунии биологӣ, кишоварзӣ ва некӯаҳволии аҳолии сайёра муҳим мебошад.
Қайд гардид, ки таҳти роҳбарии Пешвои миллат муҳтарам Эмомалӣ Раҳмон, Ҷумҳурии Тоҷикистон пайваста ташаббусҳоро барои ҳифзи пиряхҳо, рушди устувор дар минтақаҳои кӯҳӣ ва ҳифзи муҳити зист пеш мебарад.
Гуфта шуд, ташаббусҳои мушаххаси миллӣ, аз ҷумла татбиқи “Барномаи давлатии кабудизоркунии Ҷумҳурии Тоҷикистон", ки ҳадафи он шинонидани ду миллиард дарахт то соли 2040 аст, васеъ кардани шабакаи минтақаҳои ҳудудҳои табиии махсус ҳифзшаванда, ки беш аз 22 фоизи қаламрави кишварро фаро мегирад, рушди манбаъҳои энергияи барқароршаванда ва беҳтар кардани идоракунии устувори захираҳои замин ва обро дар бар мегирад.
Ҷумҳурии Тоҷикистон ба рушди кишоварзии ба иқлим тобовар, барқарорсозии экосистемаҳо, беҳтарсозии мониторинги экологӣ ва системаҳои идоракунии партовҳо таваҷҷӯҳи махсус зоҳир мекунад.
Зарурати сафарбар кардани захираҳои иловагӣ тавассути механизмҳои байналмилалии иқлимӣ ва экологӣ, аз ҷумла Фонди иқлими сабз, Фонди ҷаҳонии экологӣ ва Фонди мутобиқшавӣ, инчунин васеъ кардани имкониятҳо барои ҷалби сармоягузории хусусӣ ва интиқоли технологияҳои муосир, махсусан таъкид карда шуд.
Раиси Кумита Баҳодур Шерализода таҳияи муштараки барномаи сармоягузорӣ барои барқарор кардани экосистемаҳои кӯҳӣ, идоракунии устувори захираҳои ҷангал ва беҳтар кардани устувории иқлимӣ дар минтақаҳои кӯҳиро ҳамчун яке аз самтҳои умедбахши ҳамкорӣ пешниҳод намуд.
Иштироки Тоҷикистон дар чунин платформаҳои байналмилалӣ ба тақвияти муколамаи созанда, густариши ҳамкориҳои байналмилалӣ ва пешбурди ташаббусҳои миллӣ оид ба муҳити зист ва иқлим дар саросари ҷаҳон мусоидат мекунад.