Дар ҳошияи Ҷаласаи 45-уми Шӯрои Идоракунандагони Фонди Иқлими Сабз дар Боғи ботаникии шаҳри Душанбе чорабинии канории “Шоми шарикии маблағгузории иқлимӣ” баргузор гардид.
Чорабинӣ бо сухани ифтитоҳии муовини Сарвазири Ҷумҳурии Тоҷикистон Зиёзода Сулаймон Ризоӣ ва Директори иҷроияи Фонди Иқлими Сабз Мафалда Дуарте оғоз ёфта, таъкид гардид, ки баргузории ин чорабинӣ дар шаҳри Душанбе бозгӯи эътимоди ҷомеаи байналмилалӣ ба Тоҷикистон ва нишонаи ӯҳдадории муштараки мо ҷиҳати таҳкими ҳамкорӣ дар муқовимат ба тағйирёбии иқлим мебошад.
Шоми имрӯз имконияти хубест, то берун аз доираи музокироти расмӣ табодули афкорро идома дода, муносибатҳои шарикӣ таҳким ёбанд, ҳамкориҳои нав оғоз гардида, роҳҳои муассири сафарбарсозии маблағгузории иқлим баррасӣшаванд.
Ҷумҳурии Тоҷикистон Фонди Иқлими Сабзро ҳамчун муҳимтарин механизми байналмилалии маблағгузории иқлим ва шарики боэътимод дар таҳкими мутобиқшавӣ ба тағйирёбии иқлим, коҳиши партовҳои газҳои гулхонаӣ ва татбиқи ҳадафҳои Созишномаи Париж арзёбӣ менамояд.
Ҳукумати Ҷумҳурии Тоҷикистон сиёсати иқлим ва рушди сабзро яке аз самтҳои афзалиятноки сиёсати давлатӣ муайян намудааст. Дар ин замина, Саҳми миллии муайяншуда (NDC), Стратегияи рушди иқтисоди сабз барои солҳои 2023–2037 ва дигар ҳуҷҷатҳои стратегӣ қабул гардидаанд.
Аз ин рӯ, ҳамкории Тоҷикистон бо Фонди Иқлими Сабз барои мо аҳаммияти махсус дорад. Дастгирии Фонд дар самти таҳкими иқтидори миллӣ, таҳияи лоиҳаҳо ва сафарбарсозии сармоягузориҳои иқлимӣ барои татбиқи афзалиятҳои миллӣ нақши муҳим мебозад.
Ҳеҷ як кишвар наметавонад дар танҳоӣ барои пешгирии таъсири манфии паёмадҳои тағйирёбии иқлим муваффақ гардад. Танҳо тавассути таҳкими шарикӣ, ҳамоҳангсозии сармоягузориҳо ва мубодилаи дониш метавонем маблағгузории иқлимро бештар намуда, ба рушди устувор мусоидат кунем.