Дар ҳошияи Ассамблеяи 8-уми Фонди глобалии экологӣ (ФГЭ), ки аз 30 май то 6 июни соли 2026 дар шаҳри Самарқанди Ҷумҳурии Ӯзбекистон баргузор мегардад, раиси Кумитаи ҳифзи муҳити зисти назди Ҳукумати Ҷумҳурии Тоҷикистон Шерализода Баҳодур Аҳмадҷон як қатор мулоқотҳои дуҷонибаро бо роҳбарони ташкилотҳои байналмилалии экологӣ ва намояндагони сохторҳои давлатӣ баргузор намуд.
Аз ҷумла, мулоқотҳо бо Ноиби Президенти Ҷумҳурии Исломии Эрон ва Раиси Созмони ҳифзи муҳити зист хонум Шино Ансорӣ, Намояндаи махсуси Президенти Ҷумҳурии Озарбойҷон оид ба масъалаҳои иқлим Мухтор Бобоев, Директори иҷроияи Барномаи муҳити зисти Созмони Милали Муттаҳид (ЮНЕП) хонум Ингер Андерсен, Муовини Директори генералии Созмони озуқаворӣ ва кишоварзии Созмони Милали Муттаҳид (ФАО) ҷаноби Годфри Магвензи, Котиби иҷроияи Конвенсияҳои Базел, Роттердам ва Стокҳолм доктор Ролф Пайет, инчунин Раиси Кумитаи байниҳукуматии музокирот оид ба ифлосшавии пластикӣ Хулио Кордано баргузор гардиданд.
Дар рафти мулоқотҳо масъалаҳои густариши ҳамкориҳои бисёрҷониба дар соҳаи ҳифзи муҳити зист ва тағйирёбии иқлим, ҷалби дастгирии техникӣ ва молиявӣ, таъмини идоракунии устувори моддаҳои кимиёвӣ ва партовҳои хатарнок, мубориза бо ифлосшавии пластикӣ, афзоиши маблағгузории иқлимӣ, инчунин татбиқи лоиҳаҳои муштараки экологӣ, мутобиқшавӣ ба тағйирёбии иқлим ва рушди камкарбон мавриди баррасӣ қарор гирифтанд.
Ҷонибҳо инчунин имкониятҳои густариши ҳамкориро дар самти амалинамоии конвенсияҳои байналмилалии экологӣ, таҳкими иқтидори институтсионалӣ, такмили низоми идоракунии муҳити зист, ҳифзи гуногунии биологӣ, мутобиқшавӣ ба тағйирёбии иқлим ва пешбурди ташаббусҳои глобалии Тоҷикистон оид ба ҳифзи пиряхҳо ва татбиқи лоиҳаҳои иқлимиро баррасӣ намуданд.
Сафарбар намудани таҷрибаи пешқадам, захираҳо ва шарикиҳои нав ба татбиқи афзалиятҳои миллии экологӣ ва иқлимии кишвар, ноил шудан ба Ҳадафҳои рушди устувор ва пешбурди рӯзномаи «сабз»-и Тоҷикистон дар сатҳи байналмилалӣ мусоидат хоҳад намуд.