Ҳамкорони азиз!
Бо камоли эҳтиром ҳамаи Шуморо ба муносибати Рӯзи байналмилалии муҳити зист, ки ҳамасола 5-уми июн таҷлил мегардад, самимона табрику муборакбод менамоям.
Ин санаи муҳим ҷомеаи ҷаҳонро бори дигар барои дарки аҳаммияти ҳифзи табиат, истифодаи оқилонаи захираҳои табиӣ ва масъулияти инсон дар назди муҳити зист муттаҳид месозад.
Табиат сарчашмаи ҳаёт ва неъмати бебаҳои инсоният мебошад. Ҳифзи ҳавои тоза, оби мусаффо, замини ҳосилхез, ҷангалу наботот ва гуногунии биологӣ вазифаи муҳим ва масъулияти ҳар яки мост.
Имрӯз тағйирёбии иқлим, обшавии пиряхҳо, ифлосшавии муҳити атроф ва афзоиши партовҳо ба мушкилоти ҷиддии ҷаҳонӣ табдил ёфтаанд. Ҷумҳурии Тоҷикистон ҳамчун кишвари дорои захираҳои бузурги обӣ ва табиати нодир ба масъалаҳои экологӣ таваҷҷуҳи хосса зоҳир менамояд.
Ба шарофати ташаббусҳои байналмилалии Асосгузори сулҳу ваҳдати миллӣ -Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон - кишвари мо дар арсаи ҷаҳонӣ ҳамчун давлати ташаббускор дар масъалаҳои обу иқлим эътироф гардидааст.
Ҳифзи муҳити зист танҳо вазифаи мақомоти давлатӣ набуда, балки рисолати ҳар як шаҳрванди мамлакат мебошад. Нигоҳ доштани тозагӣ, сарфаи обу нерӯ, сабзгардонӣ, ниҳолшинонӣ ва муносибати эҳтиёткорона ба табиат саҳми арзандаи ҳар инсон дар ҳифзи муҳити зист ба ҳисоб меравад.
Бовар дорам, ки ҳар яки мо барои ободонӣ, тозагӣ ва ҳифзи табиати зебои Тоҷикистони азиз минбаъд низ саҳми муносиб мегузорем.
Бори дигар ҳамаи Шуморо ба муносибати Рӯзи байналмилалии муҳити зист табрик гуфта, бароятон саломатӣ, рӯзгори нек ва дар фаъолияти ҳамарӯзаатон комёбиҳои наҷибро орзу менамоям.
Бигзор саҳми арзишманди ҳар як сокини мамлакат дар сарсабзиву хуррамгардонӣ, тозагию ободонии кишвари азизамон ҳамеша арзишманд бошад.
Рӯзи байналмилалии муҳити зист муборак, ҳамкорони гиромӣ!