4 июни соли 2026 раиси Кумитаи ҳифзи муҳити зисти назди Ҳукумати Ҷумҳурии Тоҷикистон, Баҳодур Шерализода дар доираи сессияи роҳбарони ҳайатҳои 8-умин Ассамблеяи Фонди глобалии экологӣ (ФГЭ), ки дар шаҳри Самарқанди Ҷумҳурии Ӯзбекистон баргузор гардид, суханронӣ намуд. Дар суханронии худ таҳти мавзуи «Марҳилаи охирин то соли 2030» раиси Кумита ба зарурати таҳкими ҳамбастагии байналмилалӣ, афзоиши маблағгузории иқлимӣ ва дастрасии бештару осонтари кишварҳои осебпазир ба захираҳои молиявӣ таъкид карданд.
Дар суханронӣ ташаббусҳои ҷаҳонии Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар самти об, иқлим, ҳифзи пиряхҳо ва гуногунии биологӣ махсус таъкид гардиданд. Аз ҷумла, қабули қатъномаи Маҷмаи Умумии Созмони Милали Муттаҳид оид ба эълон намудани 21 март ҳамчун Рӯзи ҷаҳонии пиряхҳо ва қатъномаи Маҷмаи Умумии Созмони Милали Муттаҳид оид ба Рӯзи байналмилалии морхур ҳамчун дастовардҳои муҳими сиёсати экологии Тоҷикистон арзёбӣ шуданд.
Ҳамзамон, раиси Кумита ба афзалиятҳои миллии Тоҷикистон, аз ҷумла рушди энергетикаи сабз, татбиқи Барномаи кабудизоркунии кишвар то соли 2040, ҳифзи экосистемаҳои кӯҳӣ, пиряхҳо ва гуногунии биологӣ ишора намуданд. Таъкид гардид, ки дар марҳилаи омодагӣ ба ФГЭ-9 дастгирии кишварҳои рушдёбанда ва осебпазир бояд бештар ба самтҳои мутобиқшавӣ ба тағйирёбии иқлим, ҳифзи экосистемаҳои кӯҳӣ, барқарорсозии заминҳо, идоракунии устувори партовҳо ва ҳалли ҳамгирошудаи масъалаҳои об, иқлим ва табиат равона карда шавад.