26 майи соли 2026 дар ҳошияи Конфронси чоруми байналмилалии сатҳи баланд оид ба Даҳсолаи байналмилалии амал «Об барои рушди устувор, солҳои 2018-2028» вохӯриҳои раиси Кумитаи ҳифзи муҳити зисти назди Ҳукумати Ҷумҳурии Тоҷикистон Шерализода Баҳодур Аҳмадҷон бо Руслан Сайд-Хусайнович Эделгериев ёрдамчии махсуси Президенти Федератсияи Россия оид ба масъалаҳои обу иқлим ва директори департаменти масъалаҳои об ва замини Созмони Озуқа ва Кишоварзии Созмони Милали Муттаҳид Лифенг Ли баргузор гардиданд.
Зимни вохӯрӣ бо ёрдамчии махсуси Президенти Федератсияи Россия оид ба масъалаҳои обу иқлим масъалаҳои густариши ҳамкориҳо дар соҳаҳои обуҳавошиносӣ, мубодилаи таҷриба оид ба мониторинги пиряхҳо дар минтақаҳои баландкӯҳи ҷумҳурӣ, омодасозии кадрҳо дар самти обуҳавошиносӣ дар донишгоҳҳои бонуфузи Россия, инчунин иштироки мутахассисони Тоҷикистон дар экспедитсияҳои арктикӣ мавриди муҳокима қарор гирифтанд.
Дар мулоқот бо директори Департаменти масъалаҳои об ва замини Созмони Озуқа ва Кишоварзии Созмони Милали Муттаҳид, масъалаҳои ҷалби бештари маблағгузории иқлимӣ барои таҳия ва татбиқи лоиҳаҳои афзалиятноки миллӣ ва минтақавӣ дар соҳаҳои кишоварзӣ, ҷангал ва ҳифзи муҳити зист баррасӣ шуданд.
Ҷонибҳо аз сатҳи ҳамкориҳои мавҷуда изҳори қаноатмандӣ намуда, ҳамзамон таъкид карданд, ки имкониятҳо барои ҷалби бештари маблағгузории иқлимӣ ва густариши ҳамкориҳои минтақавӣ ҳанӯз фаровон мебошанд. Дар фарҷом тарафҳо барои таҳкими минбаъдаи робитаҳо ва ҳамкориҳои судманд ба мувофиқа расиданд.