Дар доираи Саммити минтақавии экологӣ (RES2026) дар шаҳри Остонаи Ҷумҳурии Қазоқистон мулоқоти раиси Кумитаи ҳифзи муҳити зист назди Ҳукумати Ҷумҳурии Тоҷикистон Шерализода Баҳодур бо муовини Дабири кулли Созмони Милали Муттаҳид ва директори иҷроияи Барномаи СММ оид ба муҳити зист (ЮНЕП) хонум Ингер Андерсен баргузор гардид.
Зимни мулоқот масъалаҳои тавсеаи ҳамкориҳои дуҷониба дар доираи ваколтаҳои ЮНЕП, инчунин дурнамои ифтитоҳи намояндагии ин ташкилот дар Ҷумҳурии Тоҷикистон мавриди баррасӣ қарор гирифтанд.
Ҷонибҳо аҳаммияти махсуси қатъномаи қабулнамудаи Ассамблеяи Созмони Милали Муттаҳид оид ба муҳити зист (UNEA) таҳти унвони "Ҳифзи пиряхҳо ва криосфера дар маҷмӯъ, махсусан дар минтақаҳои кӯҳӣ" (UNEP/EA.7/Res.10)-ро таъкид намуданд.
Хонум Ингер Андерсен омодагии худро ҷиҳати роҳандозии ҳамкории зич бо Ҷумҳурии Тоҷикистон ҳамчун ташаббускори ин қатънома иброз дошт.
Дар анҷоми мулоқот ҷонибҳо вобаста ба таҳкими минбаъдаи ҳамкорӣ ва татбиқи ташаббусҳои муштарак дар самтҳои ҳифзи муҳити зист, тағйирёбии иқлим, ҳифзи гуногунии биологӣ ва дигар самтҳои муҳими экологӣ табодули афкор намуданд.