Ҳамкорони азиз,
23 феврали соли равон аз рӯзи таъсисёбии Артиши миллии Ҷумҳурии Тоҷикистон 33 сол пур мешавад. Ин санаи муҳими таърихӣ яке аз дастовардҳои бузурги даврони Истиқлолияти давлатии кишварамон ба шумор меравад.
Рӯзи таъсисёбии Артиши миллӣ на танҳо иди касбии хизматчиёни ҳарбӣ, балки ҷашни умумимиллӣ, рамзи истиқлолият, суботи давлатӣ ва кафили амнияти кишвар мебошад. Артиши миллӣ ифодаи иродаи қавии халқ, сипари боэътимоди ҳифзи марзу буми Ватан ва нишонаи давлатдории мустақили тоҷикон аст.
23 феврали соли 1993 таъсисёбии Артиши миллии Ҷумҳурии Тоҷикистон расман эълон гашта, он оғози марҳилаи нави давлатдории тоҷиконро ифода менамояд. Таъсиси Артиши миллӣ дар шароити басо мураккаби сиёсиву иҷтимоӣ сурат гирифт, замоне ки кишвар бо мушкилоти ҷиддии дохилӣ ва беруна рӯ ба рӯ буд. Бо вуҷуди ин, бо иродаи устувор ва сиёсати хирадмандона пояҳои Артиши миллӣ тадриҷан таҳким ёфтанд.
Бо роҳнамоии Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон, Артиши миллӣ ба як ниҳоди қудратманд ва муназзам табдил ёфта, заминаҳои ҳуқуқиву ташкилӣ ва моддиву техникии он устувор гардонида шуданд. Сатҳи касбият, интизом ва масъулияти хизматчиёни ҳарбӣ пайваста боло рафта, иқтидори мудофиавии кишвар таҳким ёфт.
Имрӯз Артиши миллии Тоҷикистон ҳамчун неруи боэътимоди ҳифзи манфиатҳои миллӣ ва таъмини сулҳу субот хизмат намуда, дорои кадрҳои соҳибтаҷриба, таҷҳизоти зарурӣ ва рӯҳияи баланди ватандӯстӣ мебошад.
Мо, кормандони соҳаи ҳифзи муҳити зист низ вазифадорем, ки бо иҷрои масъулиятҳои касбӣ, назорати давлатии ҳифзи табиат ва истифодаи оқилонаи сарватҳои табиӣ дар таҳкими иқтидори иқтисодию мудофиавии кишвар саҳмгузор бошем. Зеро танҳо дар фазои сулҳу оромӣ ҷомеа метавонад бо корҳои созандагию ободонӣ машғул гардида, ба рушди устувори Ватани азизамон мусоидат намояд.
Дар арафаи 33-юмин солгарди таъсисёбии Артиши миллии Ҷумҳурии Тоҷикистон тамоми кормандони соҳаи ҳифзи муҳити зист ва дӯстдорони табиати биҳиштосои кишварамонро бо ин иди фархунда самимона табрик мегӯям.
Ба ҳар яки Шумо ва ба тамоми хизматчиёни содиқу вафодори Ватан саломатии бардавом, рӯҳияи қавӣ, сулҳу оромӣ ва муваффақиятҳои нав ба нави хизматиро таманно менамоям.