Дар партави дастуру супоришҳои Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ҷиҳати фароҳам овардани шароити арзандаи зиндагӣ ва дастгирии ҳамаҷонибаи қишрҳои ниёзманди ҷомеа, санаи 30 декабри соли ҷорӣ дар Мактаби махсуси ҷумҳуриявӣ дар арафаи Соли нави мелодӣ чорабинии идона баргузор гардид.
Дар доираи ин иқдоми хайрхоҳона, аз ҷониби Кумитаи ҳифзи муҳити зисти назди Ҳукумати Ҷумҳурии Тоҷикистон барои муҳассилин туҳфаҳои солинавӣ тақдим гардида, ҳамзамон дастархони идона ороста шуд. Ин чорабинӣ дар фазои гарму самимӣ баргузор шуда, ба дили кӯдакону наврасон шодиву фараҳ ва руҳияи болида бахшид.
Ташкилкунандагон ва роҳбарияти муассиса изҳор доштанд, ки чунин ғамхориҳо нишонаи равшани сиёсати иҷтимоии давлат ва Ҳукумати Ҷумҳурии Тоҷикистон буда, муҳассилини Мактаби махсуси ҷумҳуриявӣ пайваста зери таваҷҷуҳ ва дастгирии Пешвои миллат муҳтарам Эмомалӣ Раҳмон қарор доранд.
Таъкид гардид, ки таваҷҷуҳ ба таълиму тарбия, беҳбуди шароити зиндагӣ ва фароҳам овардани имкониятҳои мусоид барои кӯдакон ва наврасон яке аз самтҳои афзалиятноки сиёсати давлат ба шумор рафта, чунин иқдомҳои хайрхоҳона минбаъд низ идома хоҳанд ёфт.
Муҳассилин ва омӯзгорон барои дастгириҳои ҳамешагӣ ва ғамхориҳои пайваста ба Пешвои миллат муҳтарам Эмомалӣ Раҳмон изҳори сипосу миннатдорӣ намуданд.