25 декабри соли ҷорӣ бо иқдоми Кумитаи ҳифзи муҳити зисти назди Ҳукумати Ҷумҳурии Тоҷикистон дар меҳмонхонаи «Хилтон»-и шаҳри Душанбе конференсияи илмӣ-амалӣ таҳти унвони «Резервати биосферии Ромит: имкониятҳо барои рушди устувор, илм ва сайёҳии экологӣ» баргузор гардид. Чорабинии мазкур бо дастгирии шарикони рушд, аз ҷумла Дафтари барномаҳои Созмони амният ва ҳамкорӣ дар Аврупо дар шаҳри Душанбе (САҲА), Ҷамъияти олмонии ҳамкории байналмилалӣ (GIZ), ташкилоти HELVETAS Swiss Intercooperation ва Институти илмию тадқиқотии рушди усстувор ва иқтисоди сабзи Донишгоҳи байналмилалии сайёҳӣ ва соҳибкории Тоҷикистон амалӣ карда шуд.
Конфронс бо сухани ифтитоҳии муовини раиси Кумитаи ҳифзи муҳити зисти назди Хукумати Ҷумҳурии Тоҷикистон Раҳмонзода Лоиқ оғоз гардид. Дар кори конференсия олимон, коршиносон, намояндагони вазорату идораҳо, ташкилоту муассисаҳои илмӣ ва ҷамъиятии байналмилаливу дохилӣ, донишҷӯён ва волонтёрони экологӣ иштирок намуданд. Баромадкунандагон доир ба масъалаҳои муҳими ҳифзи муҳити зист, истифодаи оқилонаи захираҳои табиӣ, рушди устувор, таҳқиқоти илмӣ ва густариши сайёҳии экологӣ дар ҳудуди Резервати биосферии “Ромит” маърӯза ва рӯйнамоҳо пешниҳод намуданд.
Зимни суханрониҳо нақши Резервати биосферии “Ромит” ҳамчун минтақаи нодири табиии дорои аҳаммияти байналмилалӣ таъкид гардида, имкониятҳои истифодаи илмӣ, экологӣ ва сайёҳии он бо риояи принсипҳои рушди устувор мавриди баррасӣ қарор гирифт. Ҳамчунин масъалаҳои ҳифзи гуногунии биологӣ, таҳкими ҳамкориҳои байниидоравӣ, ҷалби ҷомеаи маҳаллӣ ва рушди сайёҳии экологӣ ҳамчун яке аз самтҳои муҳими иқтисоди сабз матраҳ шуданд.
Иштирокдорон изҳор доштанд, ки баргузории чунин чорабиниҳо барои табодули таҷриба, муаррифии натиҷаҳои таҳқиқоти илмӣ ва муайян намудани самтҳои афзалиятноки фаъолияти минбаъда дар самти ҳифзи муҳити зист ва истифодаи устувори захираҳои табиӣ аҳаммияти хос дорад.
Дар фарҷом таъкид гардид, ки натиҷаҳои конференсия метавонанд барои таҳияи пешниҳодҳои амалӣ ва таҳкими ҳамкориҳо ҷиҳати рушди минбаъдаи Резервати биосферии “Ромит” заминаи мусоид фароҳам оваранд.