Аз 24 ноябр то 5 декабри соли 2025 дар шаҳри Самарқанди Ҷумҳурии Ӯзбекистон Конфронси 20-уми Конвенсия оид ба савдои байналмилалии намудҳои ҳайвоноти ваҳшӣ ва набототи ёбоии зери хатари нобудшавӣ қарордошта (СИТЕС) баргузор гардид. Ин ҳамоиш яке аз рӯйдодҳои муҳим ва танзими савдои байналмилалии набототу ҳайвонот буда, дар он намояндагони беш аз 130 кишвар, роҳбарони созмонҳои ҷаҳонӣ, коршиносони бонуфуз ва ҷомеаи илмӣ иштирок намуданд. Барои баррасӣ масъалаҳои марбут ба ҳифзи муҳити зист, тағйирёбии иқлим, муҳофизати намудҳои нодири ҳайвонот ва таҳкими ҳамгироии кишварҳо пешниҳод гардиданд. Ҷумҳурии Тоҷикистон дар ин ҳамоиш бо ташаббуси муҳими экологӣ баромад намуд.
Ёдовар бояд шуд, ки санаи 27 ноябри соли 2025 дар доираи Конфронси зикргардида, бо ибтикори Кумитаи ҳифзи муҳити зисти назди Ҳукумати Ҷумҳурии Тоҷикистон чорабинии канорӣ оид ба мақоми ҳифз ва нигоҳдории кафтори рахдор гузаронида шуд.
Дар натиҷа пешниҳоди Ҷумҳурии Тоҷикистон оид ба Кафтори рахдор (полосатая Гиена), ки дар ҳолати ҷиддии маҳвшавӣ қарор дорад, аз Замимаи 3-и Конвенсияи мазкур ба Замимаи 2 гузаронида шуд. Ин иқдом, ки рӯзи 4 декабри соли 2025 дар ҷаласаи пленарии COP-20 расман қабул гардид, аз ҷониби аксари кишварҳои иштироккунанда дастгирӣ ёфт.
Ворид гардидани Кафтори рахдор ба Замимаи 2-и Конвенсияи CITES имкон медиҳад, ки ҳимояи байналмилалии ин намуд ба таври назаррас тақвият ёбад. Бо ин тасмим, савдои байналмилалии ҳайвон ва узвҳои он таҳти назорати қатъӣ қарор мегирад, имконоти мониторинг ва таҳқиқоти илмӣ дар сатҳи ҷаҳонӣ бештар мегардад, барномаҳои ҳамоҳангсозии байналмилалӣ оид ба ҳифзу барқарорсозии намуд густариш меёбад ва кишварҳо уҳдадор мегарданд, ки дар қаламрави худ чораҳои зарурӣ барои пешгирии қочоқ ва нестшавии ин ҳайвонро роҳандозӣ намоянд.
Дар кишварҳои Осиёи Марказӣ ин намуд ба чораҳои иловагии ҳифз ва мониторинги дақиқ эҳтиёҷманд аст. Дар ҳамин замина ташаббуси Ҷумҳурии Тоҷикистон ҳамчун иқдоми саривақтӣ ва мувофиқ ба сиёсати устувори экологии кишвар пазируфта шуд.