Муҳтарам ҳамкорон,
Ҳар як кишвар нишонаҳои давлатдории худро дорад, ки он ҳамчун муқаддасот дар сохтори давлатдорӣ ба шумор меравад. Парчами миллӣ низ яке аз нахустин нишони муқаддаси ҳар як кишвару халқ ба шумор рафта, симои миллии давлатро дар сатҳи ҷаҳонӣ таҷассум мекунад. Чунин муқаддасот аз ҳар яки мо одоби хосаи муносибат ва эҳтиромро талаб менамояд. Пос доштан ва ҳимоя кардани Парчами миллӣ ин пос доштан ва ҳимоя кардани Ватан, хонаводаву фарзандони худ, таъриху суннатҳои халқу кишвари худ аст.
Дар Ҷумҳурии Тоҷикистон пас аз ба даст овардани Истиқлолияти давлатӣ 24 ноябри соли 1992 Парчами давлатӣ қабул карда шуд. 33 сол мешавад, ки Парчами давлатии Ҷумҳурии Тоҷикистон бо намои рахшандаи худ аз ҳастии миллати куҳанбунёди тоҷикон башорат медиҳад. Тоҷикистони соҳибистиқлол таҳти роҳбарии Сарвари соҳибхираду ташаббускори мо Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва зери парчами миллӣ бо сарбаландию шарофатмандӣ ба сӯи ояндаи дурахшон қадамҳои устувор мегузорад.
Парчами миллӣ сари баланди мо, ифтихори мо, шарафи мост ва муносибати мо ба он бояд боэҳтиромона ва эҳтиёткорона бошад. Дар ҳақиқат парчам мавқеъ ва нақши хоси худро дар давлатдорӣ, дар мавриди гузаронидани чорабиниҳои расмӣ, давлатӣ, фарҳангӣ, варзишӣ, дар муносибатҳои байналмилалӣ ва дар ҳаёти ҳаррӯзаи ҳар як фарди ҷомеа гузоштааст. Вақте ки парчами давлати соҳибистиқлоли мо дар чорабиниҳои варзишию фарҳангӣ бардошта мешавад, моро як ҳиссиёти волои ватандӯстӣ фаро мегирад.
Бо ин ҳама орзуҳои нек, кормандону мутахассисони Кумита ва зерсохтори он, дӯстдорон ва муҳофизони табиати нотакрори кишварамонро ба Рӯзи қабули Парчами давлатӣ сидқан муборакбод намуда, бароятон пеш аз ҳама саломатӣ, рӯзгори ободу осоишта, хотири ҷамъ ва дар фаъолияти меҳнатиатон барору комёбҳои рӯзафзун таманно дорам.
Бигзор парчами миллии кишвари мо ҳамеша парафшон бошаду мардуми шарафманди тоҷик зери дирафши нангу номуси ватандорӣ ҳамавақт сарбаланду сарфароз бошанд.
Рӯзи Парчами давлатӣ муборак бошад!