Ҳамкрони азиз,
Дӯстдорони табиати натакрори кишвар!
Дар давлатдории навини тоҷикон 6 ноябри соли 1994 аввалин маротиба ба тарзи раъйпурсии умумихалқӣ Конститутсияи Ҷумҳурии Тоҷикистон қабул карда шуд ва имсол 31-умин солгарди ин санаи сарнавиштсози миллиамон дар ҷумҳурӣ бо ифтихормандӣ аз соҳибистиқлоливу озодии комил таҷлил карда мешавад. Конститутсия ҳуҷҷати таърихиест, ки асосҳои сохтори давлатро аз ҷиҳати сиёсӣ, иқтисодӣ ва иҷтимоӣ муайян намуда, дар он муносибати давлат ва шахсиятҳо, озодии сухан, виҷдон ва рафтору кирдори ҳар як шаҳрванд ба таври амиқ ифода гардидааст.
Конститутсия ба сифати қонуни асосӣ заминаҳои ҳуқуқии пешрафти ҷомеаро аз тариқи қабули қонунҳои нав фароҳам оварда, муносибатҳои ҷамъиятии мухталифро ба танзим медарорад ва ба асосҳои ҳуқуқии рушду такомули минбаъдаи чунин муносибатҳо мусоидат мекунад.
Дарвоқеъ, қабули Конститутсияи Тоҷикистони соҳибистиқлол, ворид гаштани тағйиру иловаҳо ба он бо ташаббус, заҳмату талошҳои Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон сурат гирифт. Аз ҷумла, дар масъалаҳои калидӣ барпо кардани давлати демократӣ, ҳуқуқбунёду дунявӣ, кафолати ҳуқуқу озодиҳои инсон, аз тариқи овоздиҳии умумихалқӣ қабул гардидани Конститутсия, таҳкими Конститутсия бо роҳи ворид намудани тағйиру иловаҳои саривақтӣ ба он, ташкил ва такмили низоми мақомоти давлатӣ ва таъмини фаъолияти самараноки он ва мисли онҳо пешниҳод, қабул ва амалӣ гардиданд, яъне Пешвои муаззамми миллат муҳтарам Эмомалӣ Раҳмон асосгузори принсипҳои муҳимтарини Конститутсияи Тоҷикистони соҳибистиқлол мебошанд.
Ҳар як шаҳрванд вазифадор аст, ки меъёрҳои Конститутсия ва талаботи қонунро риоя намояд, онҳоро эҳтиром кунад, зеро таъмини волоияти қонуну тартиботи ҳуқуқӣ беҳтарин нишонаи ҷомеаи соҳибфарҳангу масъулиятшинос буда, дар навбати худ шарти муҳимтарини оромиву осоиш ва пешрафти ҳамаи соҳаҳои ҳаёти ҷомеа ва давлат, инчунин зиндагии босаодати сокинони мамлакат мебошад.
Боварии комил дорам, ки кормандони Кумита ва тамоми соҳа дар иҷрои ин вазифаи муқаддаси давлатӣ минбаъд низ саҳми арзандаи худро мегузоранд.
Бо ин таманноҳои нек, шумоёнро ба ифтихори 31-солагии Рӯзи қабули Конститутсия табрику муборакбод намуда, барои тамоми кормандони соҳавӣ дар корҳои ободиву шукуфоии Ватани маҳбубамон пешрафту пирӯзиҳо орзумандам.
Бигузор, Конститутсия ҳамчун кафили давлатдории мустақил, шарафу номуси ватандорӣ, хонаи обод ва нерӯи ҳамаи ҷабҳаҳои ҳаёт поянда бимонад.
Ҳамеша, саломату комёб ва муваффақ бошед.