28 октябри соли 2025 дар меҳмонхонаи «Ҳаятт Риҷенси Душанбе» маросими ифтитоҳи расмии таҳияи Стратегияи дарозмуддати рушди партовҳои кам (LTS) дар Ҷумҳурии Тоҷикистон баргузор гардид. Чорабинии мазкур аз ҷониби Кумитаи ҳифзи муҳити зисти назди Ҳукумати Ҷумҳурии Тоҷикистон ва Вазорати молия дар якҷоягӣ бо Бонки ҷаҳонӣ ташкил карда шуд.
Стратегияи мазкур як санади калидӣ хоҳад шуд, ки афзалиятҳо ва чораҳои дарозмуддатро ҷиҳати ноил шудан ба рушди устувори аз карбон бетараф ва устувори кишвар муайян мекунад. Ҳадафи ин раванди стратегӣ таҳияи дурнамои ояндаи камкарбон барои Тоҷикистон бо дарназардошти афзалиятҳои миллӣ, ӯҳдадориҳои байналмилалӣ оид ба тағйирёбии иқлим ва дар дигар манбаъҳои муҳими рушд мебошад.
Дар маросими ифтитоҳи расмӣ намояндагони Кумитаи ҳифзи муҳити зист Вазорати молия ва Бонки ҷаҳонӣ суханронии намуданд. Дар баромадҳои худ онҳо ба аҳаммияти талошҳои муштарак барои мубориза бо тағйирёбии иқлим ва оқибатҳои манфии он, ҳифзи муҳити зист ва мутобиқшавӣ ба тағйирёби иқлим, таҳкими устувории иқтисод дар партови тағйирёбии иқлим ва ҷалби сармояи иқлимӣ таъкид карданд.
Дар рафти чорабинӣ ҳадафҳо, сохтор ва самтҳои асосии Стратегияи оянда муаррифӣ гардида, равишҳои он бо стратегияҳои мавҷудаи миллӣ ва ташаббусҳои байналмилалӣ, аз ҷумла Созишномаи Париж, Стратегияи миллии мутобиқшавӣ ва раванди таҷдиди Саҳмҳои Миллии Муайяншуда (NDC 3.0) баррасӣ шуданд.
Иштирокчиён таъкид карданд, ки таҳияи Стратегия ба Тоҷикистон имкон медиҳад, ки аз тадбирҳои кӯтоҳмуддат ба нақшаи рушди системавӣ ва дарозмуддати кам карбон гузарад, мавқеи кишварро дар муколамаи байналмилалии иқлим, ки Тоҷикистон бо мавқеъи фаъолаш дар масъалаҳои об ва иқлим аллакай мавқеи пешсафро ишғол мекунад, мустаҳкам намояд.
То моҳи октябри соли 2025, тибқи Конвенсияи чаҳорчӯбаи Созмони Милали Муттаҳид оид ба тағйирёбии иқлим (UNFCCC), дар саросари ҷаҳон 79 стратегияи дарозмуддати рушди партовҳои кам (LTS) ба қайд гирифта шудааст ва дар байни кишварҳои Осиёи Марказӣ ҳоло танҳо Қазоқистон стратегияи тасдиқшударо дорад.
Раванди таҳияи Стратегия дар ҳамкории зич бо вазоратҳои миллӣ, коршиносон, ҷомеаи илмӣ ва шарикони рушд сурат мегирад, ки шаффофият, фарогирӣ ва асоснокии илмии ҳалли пешниҳодшударо таъмин мекунад.
Оғози раванди қабули Стратегия барои Тоҷикистон як қадами муҳиме ба сӯи ояндаи устувор ва сабз мебошад, ки дар он рушди иқтисодӣ ва мутобиқшавӣ ба тағйирёбии иқлим ба ҳам пайвастаанд.