Иштироки намояндагони Агентии хоҷагии ҷангали назди Ҳукумати Ҷумҳурии Тоҷикистон дар семинари миллӣ — "Таҳким ва сабзгардонии занҷираҳои арзиши маҳсулоти ғайричӯбии ҷангал дар Тоҷикистон"
Санаи 18 ноябри соли 2025 дар Китобхонаи миллии Тоҷикистон, шаҳри Душанбе, Семинари миллӣ оид ба "Таҳким ва сабзгардонии занҷираҳои арзиши маҳсулоти ғайричӯбии ҷангал дар Тоҷикистон" баргузор гардид.
Дар кори семинар намояндагони Агентии хоҷагии ҷангал, ташкилотҳои байналмилалӣ, коршиносон ва мутахассисон иштирок намуда, масъалаҳои марбут ба рушди устувори маҳсулоти ғайричубии ҷангал, беҳтар намудани дастрасӣ ба бозор, сертификатсия, коркард, инвентаризатсия ва ҳамгироии онҳо ба банақшагирии идоракунии ҷангалҳои бисёрфунксионалӣ баррасӣ шуданд.
Дар ҷараёни семинар барномаҳои гуногун, аз ҷумла таҳлили занҷираи арзиши писта, бодом ва чормағз, пешниҳоди таҷрибаи байналмилалӣ, сессияҳои гурӯҳӣ, муҳокимаи имкониятҳои маблағгузорӣ ва таҳияи нақшаи роҳ барои тақвияти соҳа баргузор гардид.
Ин семинар қадами муҳим дар самти рушди маҳсулоти ғайричубии ҷангал, дастгирии хоҷагиҳои ҷангал ва баланд бардоштани нақши ин соҳа дар иқтисодиёти кишвар мебошад.