7 -уми июл Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон дар ноҳияи Шаҳристон бахшида ба 35-солагии Истиқлолияти давлатии Ҷумҳурии Тоҷикистон якқатор иншоотро маври баҳрабардорӣ қарор доданд. Ҳамчунин сарвари давлат бо лоиҳаи сармоягузорӣ барои бунёди комплекси сайёҳии Шаҳристон - эко резорт шинос шуданд.
Пешвои миллат муҳтарам Эмомалӣ Раҳмон ифтитоҳи иншооти гуногунтаъйинотро дар деҳаҳои ноҳияи Шаҳристон тадбирҳои муҳим дар самти рушди деҳот арзёбӣ намуда, роҳбарият ва сокинони ноҳияро ба саҳмгузории бештар дар ободонии Ватан ҳидоят карданд.
Сарвари давлат муҳтарам Эмомалӣ Раҳмон дар идомаи сафари корӣ дар ноҳияи Шаҳристон тариқи фосилавӣ 7 иншооти дорои аҳамияти иқтисодӣ ва иҷтимоиро мавриди истифода қарор доданд.
Нахуст Пешвои миллат муҳтарам Эмомалӣ Раҳмон ба фаъолияти Коргоҳи истеҳсоли обҳои ташнагишикани Оби Баҳор воқеъ дар мавзеи Хуррамдара расман оғоз бахшиданд. Тибқи иттилои масуълин дар иншооти мазкур 20 сокини маҳаллӣ бо ҷойи кори доимӣ ва маоши хуб таъмин гардидаанд. Ҳамчунин Сарвари давлат муҳтарам Эмомалӣ Раҳмон Ҳавзи моҳипарварии ҶДММ Технологияи сохтмонро ифтитоҳ намуданд. Иттилоъ дода шуд, ки ин ҳавз дар деҳаи Чилҳуҷраи ноҳия ҷойгир буда, барои парвариши 5 ҳазор гулмоҳӣ пешбинӣ шудааст. Дар ин иншоот низ беш аз 10 нафар соҳиби ҷойи кор гардидаанд.
Пешвои миллат муҳтарам Эмомалӣ Раҳмон ба таври фосилавӣ ба фаъолияти Парваришгоҳи дарахтони нодир дар мавзеи Хуррамдараи ноҳияи Шаҳристон низ оғоз бахшиданд.
Ҳамзамон дарар инҷо 2 иншооти соҳаи маориф – Муассисаи таҳсилоти миёнаи умумии №22 бо 240 ҷойи нишаст дар як баст дар деҳаи Чилҳуҷра ва Муассисаи таҳсилоти томактабии Шукуфаҳои Истиқлол барои 240 кӯдак дар деҳаи Шаҳристон ба таври фосилавӣ мавриди баҳрабардорӣ қарор гирифтанд. Дар ҳарду иншооти тозабунёди соҳаи маориф беш аз 80 нафар, аз ҷумла омӯзгорону парасторон ба фаъолият оғоз намуданд.
2 иншооти дигаре, ки Президенти Ҷумҳурии Тоҷикистон муҳтарам Эмомалӣ Раҳмон дар ноҳияи Шаҳристон мавриди истифода қарор доданд, марказҳои саломатӣ дар деҳаҳои Ваҳдат ва Саробӣ мебошанд. Дар ин иншоотҳои соҳаи тандурустӣ беш аз 20 корманди тиб ба мардум хизмат хоҳанд расонд.