Ҷамъомадро сардори Хадамоти зиддиинҳисорӣ Раҷабзода Ҳайдарали Раҷабали ифтитоҳ намуда, ҳозиринро ба муносибати Рӯзи Конститутсияи Ҷумҳурии Тоҷикистон табрик гуфтанд.
Зимни суханронии худ мавсуф оид ба таърихи қабули Конститутсияи Ҷумҳурии Тоҷикистон, аҳаммияти бузурги сиёсиву ҳуқуқии он дар бунёди давлати соҳибистиқлол, ташаккули низоми ҳуқуқии кишвар ва муайян намудани самтҳои асосии рушди ҷомеа ибрози андеша намуданд.
Қайд гардид, ки қабули Конститутсияи Ҷумҳурии Тоҷикистон 6 ноябри соли 1994 дар марҳилаи ниҳоят ҳассоси таърихи давлатдории навини тоҷикон рӯйдоди муҳими сиёсиву ҳуқуқӣ ба ҳисоб рафта, барои бунёди давлати демократӣ, ҳуқуқбунёд, дунявӣ ва ягона заминаи устувор гузошт. Дар ин раванд, саҳми Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар таҳия, омодасозӣ ва қабули ин санади тақдирсоз, инчунин фароҳам овардани заминаҳои сиёсиву ҳуқуқӣ барои таҳкими давлатдории миллӣ ва таъмини сулҳу субот дар кишвар басо муҳим арзёбӣ гардид.
Ҳамзамон таъкид карда шуд, ки Конститутсия ҳамчун Қонуни асосии давлат дорои эътибори олии ҳуқуқӣ буда, асосҳои сохтори конститутсионӣ, низоми мақомоти давлатӣ, ҳуқуқу озодиҳо ва уҳдадориҳои асосии инсон ва шаҳрванд, инчунин самтҳои калидии сиёсати дохиливу хориҷии кишварро муайян менамояд. Маҳз дар заминаи меъёрҳои он низоми қонунгузории миллӣ ташаккул ёфта, барои қабули қонунҳо ва санадҳои меъёрии ҳуқуқӣ дар соҳаҳои гуногуни ҳаёти иқтисодиву иҷтимоии кишвар заминаи ҳуқуқӣ фароҳам оварда шудааст.
Сипас, муовини сардори Хадамоти зиддиинҳисорӣ Азиззода Икромиддин ва намояндаи Маркази миллии қонунгузории назди Президенти Ҷумҳурии Тоҷикистон дар мавзуъҳои марбут ба мавқеи Конститутсия дар низоми ҳуқуқӣ ва қонунгузории кишвар, нақши он дар таҳкими асосҳои ҳуқуқии давлатдорӣ ва рушди муносибатҳои ҷамъиятӣ маърӯзаҳо пешниҳод намуданд.
Дар фарҷоми ҷамъомад иштирокчиён таъкид намуданд, ки эҳтиром ва риояи Конститутсия, баланд бардоштани маърифати ҳуқуқии шаҳрвандон, таҳкими волоияти қонун ва таъмини иҷрои босамари меъёрҳои он вазифаи муқаддаси ҳар як шаҳрванд ва корманди мақомоти давлатӣ ба ҳисоб меравад.
Ҷамъомад дар фазои тантанавӣ ва бо эҳсоси баланди ватандӯстӣ анҷом ёфт.