Боиси ифтихор ва сарфарозист, ки имрӯз дар тамоми шаҳру ноҳияҳои Ватани азизамон 33-юмин солгарди Рӯзи таъсисёбии Қувваҳои Мусаллаҳи Ҷумҳурии Тоҷикистон бо шукуҳу шаҳомати хоса, таҷлил гардида истодааст.
Бо камоли эҳтиром ва самимияти бепоён тамоми хизматчиёни ҳарбиро ба ифтихори 33-юмин солгарди таъсисёбии Қувваҳои Мусаллаҳи Ҷумҳурии Тоҷикистон табрику муборакбод намуда, бароятон пеш аз ҳама, тансиҳатию сарбаландӣ ва хонаободӣ орзу менамоям ва ба Тоҷикистони азизамон пойдории сулҳу суботи ҷовидонаро орзумандам.
Имрӯз мо метавонем бо ифтихору қаноатмандӣ иброз намоем, ки афсарону сарбозони Қувваҳои Мусаллаҳи Ҷумҳурии Тоҷикистон аз бисёр имтиҳону озмоишҳои сахту сангин бо сари баланд гузашта, рисолати хизмативу касбии худро бошарафона иҷро карданд ва Артиши миллии 33 сол пеш таъсисдодаи мо ҳоло ба як сохтори воқеан боэътимод ва муназзаму муосири давлати соҳибистиқлоли Тоҷикистон табдил ёфтааст.
Артиш ё худ Қувваҳои Мусаллаҳ яке аз рукнҳои асосии давлатдорӣ, пояи матин ва кафили бехатарии ҳар як кишвар мебошад.
Зеро, ягон давлат бе артиши миллии бо иқтидору муҷаҳҳаз пойдор буда наметавонад.
Ҳайати шахсии Қувваҳои Мусаллаҳи Ҷумҳурии Тоҷикистон дар солҳои душвори мухолифати дохилӣ ва ҷанги таҳмилии шаҳрвандӣ қарзи фарзандӣ ва вазифаи хизматии худро бо садоқат ба халқу Ватан иҷро карда, дар роҳи барқарорсозии сохти конститутсионӣ, ба эътидол овардани вазъият, безарар гардонидани гуруҳҳои экстремистиву террористӣ, таъмин намудани волоияти қонун ва сулҳу субот дар кишвар саҳми воқеан таърихӣ гузошт.
Дар ин роҳ ҳазорон нафар афсарону сарбозони мо қаҳрамониву фидокорӣ нишон дода, ба хотири барқарорсозии сохти конститутсионӣ, сулҳу оромӣ, субботи сиёсӣ ва ваҳдати миллӣ ҷони худро қурбон карданд.
Ҳукумати ҷумҳурӣ ва мардуми тоҷик хотираи неки он ҷавонмардонро ҳаргиз фаромӯш намекунанд ва хизматҳои таърихии фарзандони далеру шуҷои худро пос медоранд.
Зикр кардан ба маврид аст, ки Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон, Сарфармондеҳи Қувваҳои Мусаллаҳи Ҷумҳурии Тоҷикистон, генерали артиш, муҳтарам Эмомалӣ Раҳмон пайваста нақши Артиши миллиро дар раванди барқарор намудани сохти конститутсионӣ, ҳифзи дастовардҳои истиқлол, ба эътидол овардани вазъи сиёсию ҳарбӣ, пуштибонӣ аз сулҳу оромӣ ва ваҳдати миллӣ,махсусан муҳим арзёбӣ намудаанд.
Бояд қайд намуд, ки сохторҳои мухталифи Артиши миллӣ рамзи олии ватану ватандорӣ, сипари воқеӣ аз таҳдидҳои ҳарбӣ ва пойдевори истиқлоли давлатӣ дар шароити рушди давлатдории миллии тоҷикон мебошанд.
Афсарону аскарони ҷонфидои сохторҳои мухталифи Қувваҳои Мусаллаҳи Ҷумҳурии Тоҷикистон ва дигар ниҳодҳои давлатӣ дар таҳкиму ҳимояи манфиатҳои ҳарбии Ҷумҳурии Тоҷикистон нақши тақдирсоз дошта, дар шароити муракабу тагйирёбандаи минтақа ва ҷаҳон барои таъмини амнияти давлат ва миллат пайваста дар талош мебошанд.
Лозим ба ёдоварист, ки Ҳукумати Ҷумҳурии Тоҷикистон ҷиҳати боз ҳам беҳтар намудани сатҳи таъминоти иҷтимоии хизматчиёни ҳарбӣ пайваста тадбирҳои заруриро роҳандозӣ намуда истодааст.
Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон қайд намудаанд, ки «Мардуми Тоҷикистон бо афсарону сарбозони Қувваҳои мусаллаҳ ва кормандони мақомоти ҳифзи ҳуқуқ, яъне фарзандони содиқу вафодори худ ифтихор мекунанд ва эътимоди комил доранд, ки хизматчиёни ҳарбии Тоҷикистони соҳибихтиёр, дар оянда низ аз уҳдаи ҳимояи Ватан, давлат ва зиндагии осудаи сокинони кишвар сарбаландона мебароянд».
Меҳре, ки ба модари худ дорем, бояд ба ватани азизи худ низ, дошта бошем.
Мо аз саҳми басо арзишманди ҳайати шахсии Қувваҳои Мусаллаҳи Ҷумҳурии Тоҷикистон, кормандони мақомоти ҳифзи ҳуқуқ ва собиқадорон дар ҳимояи истиқлолу озодии Ватан ва дастовардҳои бузургу таърихии халқамон – сулҳу оромӣ, суботи сиёсӣ, ваҳдати миллӣ, ҳифзи марзҳои муқаддаси давлати тоҷикон, таъмини амнияти давлат ва халқи Тоҷикистон ҳамеша сипосгузорем.
Бо таманнои ҳамин орзую ниятҳои нек, бори дигар тамоми ҳайати шахсии Қувваҳои Мусаллаҳи Ҷумҳурии Тоҷикистон, кормандони мақомоти ҳифзи ҳуқуқ ва собиқадоронро ба ифтихори 33-солагии таъсиси Артиши миллӣ самимона табрику муборакбод гуфта, ба ҳар яки Шумо, пеш аз ҳама тансиҳатию сарбаландӣ ва дар роҳи ҳифзи Ватан иродаи қавӣ, рӯҳияи баланд ва барору комёбиҳо орзу менамоям.
Ҷашни 33-юмин солгарди таъсисёбии Қувваҳои Мусаллаҳи Ҷумҳурии Тоҷикистон муборак, муҳофизони ғаюру ҷасури Ватан!