Агентии захираҳои моддии давлатии назди Ҳукумати Ҷумҳурии Тоҷикистон дар ҷаласаи Комиссияи байниҳукуматии Тоҷикистон ва Туркманистон иштирок намуд.
3 марти соли 2026 дар шаҳри Душанбе ҷаласаи чордаҳуми Комиссияи муштараки байниҳукуматии Ҷумҳурии Тоҷикистон ва Туркманистон оид ба ҳамкории тиҷоратию иқтисодӣ ва илмию техникӣ баргузор гардид.
Ҷаласа таҳти раёсати ҳамраисони Комиссия — муовини Сарвазири Ҷумҳурии Тоҷикистон Сулаймон Зиёзода ва муовини Раиси Девони вазирони Туркманистон Тангригулӣ Атахаллиев баргузор шуда, дар кори он намояндагони вазорату идораҳои ду кишвар, аз ҷумла намояндагони Агентии захираҳои моддии давлатии назди Ҳукумати Ҷумҳурии Тоҷикистон иштирок намуданд.
Дар ҷараёни вохӯрӣ зикр гардид, ки бо шарофати иродаи сиёсӣ ва дастгирии роҳбарияти олии ду давлат ҳамкории Ҷумҳурии Тоҷикистон ва Туркманистон мунтазам рушд ёфта истодааст. Аз ҷумла, ҳаҷми гардиши савдо байни ду кишвар дар соли 2025 ба 43,1 миллион доллари ИМА баробар гардида, нисбат ба соли 2024 17,1 фоиз афзоиш ёфтааст.
Ҷонибҳо вазъ ва дурнамои ҳамкории дуҷонибаро баррасӣ намуда, масъалаҳои рушди робитаҳои тиҷоратию иқтисодӣ, нақлиёт ва коммуникатсия, энергетика ва захираҳои об, саноат ва сохтмон, кишоварзӣ, маориф ва илм, тандурустӣ, авиатсияи гражданӣ, инчунин густариши ҳамкории фарҳангӣ-гуманитариро мавриди муҳокима қарор доданд.