Паёми Асосгузори сулҳу Ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон – роҳнамои рушди илм ва ҷомеа
Паёми Сарвари давлат ҳамчун санади муҳими стратегӣ ва барномавӣ дурнамои рушди минбаъдаи иқтисодӣ, иҷтимоӣ, илмӣ ва фарҳангии кишварро муайян намуда, самтҳои асосии сиёсати дохилию хориҷии ҷумҳуриро дар марҳилаи нави рушд ба таври возеҳ нишон медиҳад. Ин санади муҳими давлатӣ барои фаъолияти минбаъдаи ниҳодҳои илмӣ, таҳқиқотӣ ва муассисаҳои таълимӣ ҳамчун роҳнамо хизмат карда, заминаи мусоидро барои таҳкими ҳамкории илм бо истеҳсолот ва татбиқи дастовардҳои илмӣ дар амал фароҳам месозад.
Дар Паёми навбатӣ ба рушди илму маориф, ҷорӣ намудани навовариҳои технологӣ, таҳкими иқтидори кадрии илмӣ ва истифодаи васеи натиҷаҳои таҳқиқоти илмӣ дар иқтисоди миллӣ таваҷҷуҳи махсус зоҳир гардид. Таъкид шуд, ки бе рушди илм, такя ба донишҳои муосир ва омода намудани мутахассисони рақобатпазир таъмини рушди устувор ва пешрафти иқтисоди миллӣ ғайриимкон мебошад. Ин нуктаҳо нақши муҳими олимон, муҳаққиқон ва зиёиёнро дар татбиқи барномаҳои давлатӣ боз ҳам тақвият мебахшанд.
Ҳамчунин, пешниҳоди Пешвои миллат оид ба таъсиси Маркази тамаддуни ориёӣ ва Маркази байналмилалии Наврӯз ҳамчун иқдоми муҳим дар самти эҳё, ҳифз ва муаррифии мероси ғании таърихию фарҳангии тоҷикон арзёбӣ гардид. Ташкили чунин марказҳо метавонад ба таҳкими худшиносии миллӣ, рушди фарҳанг ва густариши ҳамкориҳои фарҳангӣ бо кишварҳои хориҷӣ мусоидат намояд.
Дар баробари ин, дар Паём ба татбиқи тадбирҳои иҷтимоӣ, аз ҷумла афзоиши музди меҳнати кормандони соҳаҳои иҷтимоӣ, илм, маориф ва тандурустӣ, баланд бардоштани сатҳи некуаҳволии аҳолӣ ва дастгирии қишрҳои осебпазир таваҷҷуҳи хосса зоҳир гардид. Ин тадбирҳо ба беҳтар гардидани шароити зиндагии шаҳрвандон ва баланд бардоштани ҳавасмандии мутахассисон мусоидат менамоянд.
Ҳалли пурраи масъалаҳои сарҳадии байни Ҷумҳурии Тоҷикистон ва Ҷумҳурии Қирғизистон, инчунин ба имзо расидани шартнома миёни Ҷумҳурии Тоҷикистон, Ҷумҳурии Қирғизистон ва Ҷумҳурии Узбекистон оид ба нуқтаи пайвастшавии сарҳади давлатии се кишвар ва қабули Эъломияи Хуҷанд доир ба дӯстии абадӣ ҳамчун рӯйдодҳои муҳими сиёсиву таърихии соли 2025 арзёбӣ шуданд. Ин дастовардҳо ба таҳкими сулҳу субот, рушди ҳамкориҳои минтақавӣ ва таъмини амнияти устувор заминаи мусоид мегузоранд.
Гуфта шуд, ки дар сатҳи байналмилалӣ низ пешниҳодҳои Ҷумҳурии Тоҷикистон эътироф ва қабул гардидаанд. Аз ҷумла, қабули қатъномаҳо доир ба «Ҳифзи пиряхҳо ва криосфера, бахусус дар минтақаҳои кӯҳӣ», «Нақши зеҳни сунъӣ дар фароҳам овардани имконоти навин барои рушди устувор дар Осиёи Марказӣ», ба Феҳристи мероси ҷаҳонии ЮНЕСКО ворид гардидани ёдгориҳои мероси фарҳангии Хутали қадим, инчунин қабули қатъномаи Маҷмаи Умумии Созмони Милали Муттаҳид дар хусуси эълон гардидани соли 2027 ҳамчун «Соли байналмилалии маърифати ҳуқуқӣ» нишонаи нуфуз ва мақоми рӯзафзуни кишвар дар арсаи ҷаҳонӣ ва мавқеи кишварро ҳамчун давлати пешсаф дар ҳалли масъалаҳои глобалии экологӣ таҳким мебахшанд.
Паёми навбатии Пешвои миллат ҳамчун роҳнамои муҳими рушди кишвар ҷомеаи илмӣ, коршиносон ва зиёиёнро ба иштироки фаъол дар татбиқи ҳадафҳои стратегӣ, рушди илму инноватсия ва таъмини ояндаи устувору шукуфони Тоҷикистон ҳидоят менамояд.
Сармутахассиси Раёсати ташкил ва
идораи захираи давалтӣ
Ниёззода Саинуъмони Сиадҳомид