13 феврали соли 2025 дар Вазорати рушди иқтисод ва савдои Ҷумҳурии Тоҷикистон вохӯрии Вазири рушди иқтисод ва савдо Завқизода Завқӣ Амин бо Роҳбари Намояндагии Бонки Рушди Осиё (БРО) дар Тоҷикистон Ко Сакамото баргузор гардид.
Завқизода З. А. таъкид намуд, ки таҳти роҳбарии Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон кишвар ба рушди устувори иқтисодӣ, тавсеаи ҳамкориҳои байналмилалӣ ва ҷалби сармоягузориҳои хориҷӣ аҳамияти аввалиндараҷа медиҳад.
Дар ин замина Ҳукумати кишвар Бонки Рушди Осиёро ҳамчун яке аз шарикони боэътимод арзёбӣ намуда, нақши онро дар татбиқи афзалиятҳои рушди миллӣ муҳим медонад.
Зикр гардид, ки то имрӯз БРО ба иқтисодиёти Тоҷикистон тақрибан 2,6 миллиард доллар сармоягузорӣ намудааст ва ҳаҷми лоиҳаҳои амалкунандаи ин бонк дар кишвар айни ҳол 947 миллион долларро ташкил медиҳад.
Завқизода З. А., бо дарназардошти саҳми дигар кишварҳои сармоягузор, аз ҷумла Бонки Ҷаҳонӣ, Бонки Исломии Рушд ва дигар муассисаҳои молиявии байналмилалӣ, Бонки Рушди Осиёро даъват намуд, ки ба маблағгузории НБО «Роғун» ҳамроҳ шавад ва ҳарчи зудтар маблағи 500 миллион долларро тасдиқ намояд.
Ҳамзамон, ба Бонки Рушди Осиё пешниҳоди расонидани кӯмаки техникӣ ва молиявӣ барои таҳияи Барномаи рушди миёнамуҳлати Ҷумҳурии Тоҷикистон барои солҳои 2026-2030 ва Барномаи рушди содирот барои солҳои 2026-2030 иброз гардид. Ҳадафи ин барномаҳо танзими устувори рушди иқтисодӣ ва таҳкими робитаҳои тиҷоратӣ мебошад.