14 сентябри соли 2026 вохӯрии Муовини вазири рушди иқтисод ва савдо Восидиён Ф. С. бо Директори генералии Маркази ҳамкории бисёрҷониба оид ба маблағгузории рушд (MCDF) Чжунҷин Ванг баргузор гардид.
Дар ҷараёни вохӯрӣ масъалаҳои марбут ба таҳкими ҳамкориҳои дуҷониба, рушди инфрасохтори босифат, тавсеаи робитаҳои минтақавӣ ва амалисозии лоиҳаҳои афзалиятноки сармоягузорӣ мавриди баррасӣ қарор гирифтанд.
Восидиён Ф. С. қайд намуд, ки ба шарофати сиёсати созанда ва дурандешонаи Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон, ҳамкориҳои иқтисодии хориҷӣ ва шарикӣ бо сохторҳои байналмилалӣ ба сатҳи нав баромада, миқёси ҳамгироии минтақавӣ пайваста густариш меёбад.
Ҳамзамон аз ҷониби Восидиён Ф. С. афзалиятҳои стратегии кишвар, аз ҷумла рушди иқтисоди сабз, гузариш ба энергияи барқароршаванда, мутобиқшавӣ ба тағйирёбии иқлим ва инчунин рушди долонҳои нақлиётию логистикӣ мавриди таваҷҷуҳ қарор дода шуданд.
Дар ин замина, масъалаҳои ҳамкории мутақобила ва татбиқи лоиҳаҳо дар доираи Барномаи давлатии сармоягузорӣ барои солҳои 2026-2030 ва истифодаи имкониятҳои Маркази ҳамкории бисёрҷониба оид ба маблағгузории рушд баррасӣ шуданд.
Дар анҷоми вохӯрӣ ҷонибҳо омодагии худро ҷиҳати густариши минбаъдаи ҳамкориҳои тиҷоратию иқтисодӣ ва ҷалби сармоя барои татбиқи лоиҳаҳои афзалиятноки сармоягузорӣ изҳор доштанд