15 январи соли 2025 дар доираи сафари расмии делегации Ҷумҳурии Исломии Эрон дидори Вазири рушди иқтисодӣ ва савдои Ҷумҳурии Тоҷикистон Завкизода Завки Амин бо Раиси Палатаи савдо, саноат, маъдан ва кишоварзии Ҷумҳурии Исломии Эрон Самад Хасанзода баргузор шуд.
Завкизода З. А. қайд намуд, ки сиёсати хирадмандона ва иқдоми Асосгузори сулҳу ва ягонагии миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва Президенти Ҷумҳурии Исломии Эрон муҳтарам Масъуд Пизишкиен як асоси устувор барои рушди ҳамаҷониба ва ҳамкории муфиди байни ду кишвар эҷод намудаанд.
Дар ҷараёни дидор ҷонибҳо масъалаҳои муҳимми ҳамкории савдо-иқтисодиро муҳокима намуданд, инчунин иҷрои лоиҳаҳои муштарак, аз ҷумла Нерӯгоҳи барқи обии «Сангтуда-2» ва туннели «Истиқлол» баррасӣ шуд.
Завкизода З. А. гуфт, ки ҳаҷми гардиши тиҷорати дуҷониба дар соли 2024 378 миллион долларро ташкил дода, ҳаҷми сармоягузориҳои мустақим танҳо 0,5 миллион долларро ташкил дод. Дар ин замина таъкид шуд, ки ин нишондиҳандаҳо нисбат ба потенсиалҳои мавҷудаи ду кишвар кам мешаванд ва барои афзоиши тиҷорати мутақобила ва ҷалби сармояи бештар чораҳои ҷиддӣ бояд андешида шаванд.
Самад Хасанзода изҳори омодагӣ намуд, ки ҷонибҳои эронӣ барои васеъ кардани ҳамкориҳо ва тавассути тақвият додани ҳамкорӣ дар бахши инфрасохтор ва афзоиши сармоягузориҳо имкониятҳои нави рушди иҷтимоии-иқтисодии ҳар ду кишварро эҷод намоянд.
Дидор дар як атмосфераи дӯстона сурат гирифт, ҷонибҳо омодагии худро барои истифодаи пурраи имкониятҳои мавҷуда ва амалӣ кардани лоиҳаҳои муштарак дар соҳаҳои саноат, тиҷорат ва сармоягузорӣ изҳор намуданд.