30 июли соли 2026 дар Вазорати рушди иқтисод ва савдои Ҷумҳурии Тоҷикистон таҳти роҳбарии муовини вазири рушди иқтисод ва савдо Восидиён Фарҳод Саъдулло барои кормандони дастгоҳи марказии вазорат хониши идоравӣ дар мавзӯи «Рақамигардонӣ – омили асосии мубориза бар зидди коррупсия» баргузор гардид.
Дар оғози чорабинӣ Восидиён Ф. С. таъкид намуд, ки коррупсия яке аз зуҳуроти хатарноки ҷомеа буда, ба рушди устувори иҷтимоию иқтисодӣ ва амнияти миллӣ таъсири манфӣ мерасонад. Дар ин замина, рақамикунонии равандҳои давлатӣ ва иқтисодӣ ҳамчун воситаи муассири коҳиш додани омили инсонӣ, таъмини шаффофият ва пешгирии ҳолатҳои коррупсионӣ арзёбӣ гардид.
Сипас, сармутахассиси Раёсати рушди иқтисоди рақамӣ Қосимзода Бахтовар Гурез вобаста ба истифодаи технологияҳои рақамӣ дар пешгирии коррупсия рӯнамо пешниҳод намуда, оид ба рушди хизматрасониҳои давлатии электронӣ, пардохтҳои ғайринақдӣ, гардиши электронии ҳуҷҷатҳо, савдои электронӣ ва истифодаи зеҳни сунъӣ дар соҳаҳои бонкӣ, молиявӣ ва саноат маълумот дод.
Дар анҷоми хониши идоравӣ таъкид гардид, ки истифодаи васеи хизматрасониҳои давлатӣ дар шакли электронӣ, пардохтҳои ғайринақдӣ ва низоми ягонаи гардиши электронии ҳуҷҷатҳо дар таъмини шаффофият ва муқовимат ба коррупсия нақши муҳим дошта, кормандони вазоратро ба истифодаи самараноки имкониятҳои рақамӣ даъват намуд.