16 июли соли 2026 Вазири рушди иқтисод ва савдо Абдураҳмонзода Абдураҳмон Сафаралӣ дар шаҳри Ню-Йорк дар чорабинии сатҳи баланди Шӯрои иқтисодӣ ва иҷтимоии Созмони Милали Муттаҳид (ECOSOC) таҳти унвони «Роҳ ба сӯи соли 2030» иштирок ва суханронӣ намуд.
Зимни баромади худ Вазири рушди иқтисод ва савдо қайд намуд, ки Ҷумҳурии Тоҷикистон татбиқи Ҳадафҳои рушди устуворро дар доираи Барномаи миёнамуҳлати рушди Ҷумҳурии Тоҷикистон барои солҳои 2026–2030, ки марҳилаи сеюми амалисозии Стратегияи миллии рушди Ҷумҳурии Тоҷикистон барои давраи то соли 2030 ба ҳисоб меравад, идома дода, самтҳои афзалиятнок, аз ҷумла рушди фарогири иқтисодӣ, саноатикунонии босуръат, иқтисоди «сабз», рақамикунонӣ, рушди сармояи инсонӣ ва истифодаи самараноку устувори захираҳои табииро муҳим арзёбӣ менамояд.
Инчунин таъкид гардид, ки Саммити Ҳадафҳои рушди устувори соли 2027 ба сафарбар намудани сармоягузорӣ, дастрасӣ ба маблағгузорӣ, технология ва навоварӣ, инчунин тақвияти дастгирии кишварҳои рӯ ба тараққӣ, бахусус кишварҳои кӯҳӣ ва маҳсур дар хушкӣ равона карда шавад.