14 июли соли 2026 Вазири рушди иқтисод ва савдо Абдураҳмонзода Абдураҳмон Сафаралӣ дар Форуми сиёсии сатҳи баланд оид ба рушди устувор - 2026 (HLPF), ки дар қароргоҳи Созмони Милали Муттаҳид дар шаҳри Ню-Йорк баргузор гардид, иштирок ва суханронӣ намуд.
Зимни баромади худ Абдураҳмонзода А. С. таваҷҷуҳи махсусро ба аҳаммияти об ҳамчун асоси рушди устувор равона намуда, изҳор дошт, ки Ҷумҳурии Тоҷикистон таҳти роҳбарии хирадмандона ва дурандешонаи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон тайи солҳои охир пайваста ташаббусҳои байналмилалиро дар соҳаи об дар чаҳорчӯби Созмони Милали Муттаҳид пешбарӣ намуда, дар ташаккули рӯзномаи ҷаҳонии об нақши муҳим дорад.
Инчунин қайд гардид, ки барои суръат бахшидан ба татбиқи Ҳадафҳои рушди устувор (ҲРУ) тақвияти шарикии байналмилалӣ, таъмини маблағгузории устувору пешбинишаванда ва густариши ҳамкориҳои байналмилалӣ аҳаммияти калидӣ доранд.