2 июли соли 2026 дар бинои Вазорати рушди иқтисод ва савдо тибқи супориши Роҳбари Дастгоҳи иҷроияи Президенти Ҷумҳурии Тоҷикистон таҳти роҳбарии муовини вазири рушди иқтисод ва савдо Восидиён Фарҳод Саъдулло бо иштироки намояндагони вазорату идораҳои дахлдор чорабинии омӯзишӣ ҷиҳати рушди малакаҳои рақамӣ барои ҳайати кормандони дастгоҳи марказии вазорат баргузор гардид.
Дар оғози ҷаласа Восидиён Фарҳод Саъдулло ба ҳозирин муҳимият, афзалият ва самаранокии ҳукумати электронӣ ва махсусан истифодаи васеи хизматрасониҳои давлатиро дар реҷаи вақти воқеӣ иброз намуд. Инчунин қайд гардид, ки дар асри XXI - рақамикунонӣ яке аз муҳаррики асосии рушди иқтисодӣ ба ҳисоб рафта, дар ҳоли пурра рақамикунонии соҳаҳои иқтисодию иҷтимоӣ ба манбаъҳои иловагии рушд замина мегузорад.
Дар идомаи чорабинӣ Яздонзода Исфандиёр Ҳамроқул – муовини якуми Директори Агентии инноватсия ва технологияҳои рақамии назди Президенти Ҷумҳурии Тоҷикистон қайд намуд, ки тибқи Амри Президенти Ҷумҳурии Тоҷикистон аз 14 июни соли 2025, №АП-815 солҳои 2025-2030 ҳамчун «Солҳои рушди иқтисоди рақамӣ ва инноватсия» эътироф гардида, дар доираи нақшаи чорабиниҳои он баргузории семинарҳои омӯзишӣ вобаста ба баланд бардоштани малакаҳои рақамии хизматчиёни давлатӣ ва шаҳрвандон ба нақаша гирифта шудааст.
Ҳамзамон ба ҳайати дастгоҳи марказии вазорат аз ҷониби намояндагони Агентии инноватсия ва технологияҳои рақамӣ, Бонки миллии Тоҷикистон ва Хадамоти алоқа рӯнамо вобаста ба истифодаи низоми ягонаи гардиши ҳуҷҷатҳои электронӣ, портали ягонаи хизматрасониҳои давлатӣ, инчунин истифодаи васеи пардохтҳои ғайринақдӣ пешкаш гардид.
Дар фарҷоми семинари омӯзишӣ Восидиён Фарҳод Саъдулло ба намояндагони вазорату идораҳо ҷиҳати саҳмгузорӣ дар баланд бардоштани сатҳи савияи дониши рақамии кормандони дастгоҳи марказии вазорат изҳори сипос намуд.