18-19 июни соли 2026 дар шаҳри Бокуи Ҷумҳурии Озарбойҷон ҷаласаи солона ва мизи мудаввари мудирони Гурӯҳи Бонки Исломии Рушд баргузор гардид, ки дар кори онҳо Вазири рушди иқтисод ва савдо/мудири кишварии Бонки Исломии Рушд аз Тоҷикистон Абдураҳмонзода Абдураҳмон Сафаралӣ иштирок ва суханронӣ намуд.
Қайд бояд кард, ки ҷаласаи солонаи БИР яке аз чорабиниҳои асосии Бонк ба ҳисоб рафта, дар он масълаҳои стратегии ҳамкориҳои Бонк бо кишварҳои аъзо баррасӣ гардид. Ҳамзамон буҷети Бонк барои маблағгузории кишварҳои аъзо зиёд карда шуда, Фонди кафолатии хурди БИР ва Шурои аудиторон таъсис ёфта, раисии Шурои мудирони БИР аз Ҷумҳурии Озарбойҷон ба кишвари Буркина-Фасо гузашта, баргузории ҷаласаҳои 52-юми БИР соли 2027 дар шаҳри Ҷиддаи Арабистони Саудӣ тасдиқ карда шуд.
Дар ҷаласаи солонаи Бонк Президенти Гурӯҳи Бонки Исломии Рушд доктор Муҳаммад Сулаймон Ал-Ҷассер бори дигар ба муҳлати 5 сол Президенти Бонки мазкур интихоб гардид.
Абдураҳмонзода А. С. зимни баромади худ дар ҷаласаҳои мазкур қайд намуд, ки бо дастгирӣ ва ташаббусҳои созандаю бунёдкоронаи Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ҳамкорӣ бо Гурӯҳи Бонки Исломии Рушд дар сатҳи муносиб ба роҳ монда шудааст.
Иттилоъ дода шуд, ки дар натиҷаи тадбирҳои андешидаи Ҳукумати мамлакат Тоҷикистон ба марҳилаи нави рушд ворид шуда, дар моҳҳои январ-майи соли ҷори суръати рушди иқтисоди миллии кишвар ба 8,1 фоиз расида, рушди минбаъдаи кишварро дар самтҳои обу энергетика, нақлиёт, “иқтисоди сабз”, иқлим, иқтисоди рақамӣ, инноватсия, маориф, тандурустӣ, моликияти зеҳнӣ, инчунин неруи инсонӣ муҳим арзёбӣ намуд.
Боиси сарфарозӣ аст, ки дар ҷаласаҳои мазкур Ҷумҳурии Тоҷикистон аъзои комилҳуқуқи Корпоратсияи суғуртаи сармоягузорӣ ва қарзҳои содиротии БИР гардид.
Қайд кардан ба маврид аст, ки БИР яке аз шарики муҳими Ҷумҳурии Тоҷикистон ба шумор рафта, барои татбиқи лоиҳаҳои афзалиятноки кишвар дар соҳаҳои мухталифи иқтисодию иҷтимоӣ маблағгузорӣ намудааст.