Ҳайати кишвар таҳти роҳбарии Восидиён Фарҳод Саъдулло - муовини вазири рушди иқтисод ва савдои Ҷумҳурии Тоҷикистон дар доираи Барномаи Ҳамкориҳои минтақавии иқтисодии Осиёи Марказӣ (CAREC) дар музокироти муқаддамотии лоиҳаи Созишномаи шарикӣ оид ба содагардонии савдо ва сармоягузорӣ (CARTIF), ки санаи 3 июни соли 2026 дар шаҳри Улан-Батори Муғулистон баргузор гардид, иштирок ва суханронӣ намуд.
Восидиён Ф. С. қайд намуд, ки бо шарофати сиёсати хирадмандонаи Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ва сарони кишварҳои Барномаи Ҳамкориҳои минтақавии иқтисодии Осиёи Марказӣ ҳамкориҳои минтақавӣ тамоюли рушдро касб карда, Тоҷикистон ба густариши муносибатҳои иқтисодию тиҷоратӣ, беҳтар кардани фазои сармоягузорӣ, содагардонии расмиёти савдо ва бартараф намудани монеаҳои техникӣ ва рушди устувор ҳавасманд мебошад.
Кайд бояд кард, ки CARTIF Созишномаи шарикӣ оид ба содагардонии савдо байни кишварҳои аъзои Барномаи Ҳамкориҳои минтақавии иқтисодии Осиёи Марказӣ нигаронида шудааст. CARTIF бо мақсади таъсиси шарикии минтақавии фарогиру шаффоф ҷиҳати мусоидати савдо ва сармоягузории фаромарзӣ бо эътирофи нақши афзояндаи технологияҳои рақамӣ, логистика ва иқтисоди инноватсионӣ барои расидан ба тиҷорати устувор, фарогир ва мутақобилан судманд дар рушди минтақа ва таҳкими муносибатҳои иқтисодии ҳавзаи CAREC роҳандозӣ гардидааст.
Дар анҷоми ҷаласа ҷонибҳо барои баргузории давраҳои навбатии музокирот оид ба мувофиқаи лоиҳаи Созишномаи шарикӣ оид ба содагардонии савдо ва сармоягузорӣ омодагии худро изҳор намуданд.