30 апрели соли 2026 дар Вазорати рушди иқтисод ва савдо ҷаласаи сатҳи баланди Кумитаи муштараки роҳбарикунандаи Ҳукумати Ҷумҳурии Тоҷикистон ва Созмони Милали Муттаҳид таҳти роҳбарии Вазири рушди иқтисод ва савдо Абдураҳмонзода Абдураҳмон Сафаралӣ ва Ҳамоҳангсози доимии Созмони Милали Муттаҳид дар Ҷумҳурии Тоҷикистон Парвати Рамасвами, инчунин бо иштироки намояндагони вазорату идораҳои дахлдор баргузор гардид.
Абдураҳмонзода А. С. қайд намуд, ки таҳти сиёсати хирадмандонаи Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва тадбирҳои андешидаи Ҳукумати кишвар ҳамкорӣ бо Созмони Милали Муттаҳид дар самтҳои рушди устувор, таҳкими сармояи инсонӣ, саноатикунонӣ, иқтисоди рақамӣ, иқтисоди “сабз” ва дигар соҳаҳои афзалиятнок пайваста густариш меёбад.
Инчунин таъкид гардид, ки Барномаи ҳамкории СММ оид ба рушди устувор барои солҳои 2023–2026 ба афзалиятҳои Стратегияи миллии рушди Ҷумҳурии Тоҷикистон барои давраи то соли 2030, Барномаи рушди миёнамуҳлат барои солҳои 2026 - 2030 ва Ҳадафҳои рушди устувор ҳамоҳанг буда, ҳамчун воситаи муҳими татбиқи сиёсати иқтисодию иҷтимоии давлат хизмат менамояд.
Дар анҷоми ҷаласа ҷонибҳо омодагии худро ҷиҳати идомаи ҳамкории мутақобилан судманд, тақвияти ҳамоҳангсозии барномаҳо ва сафарбар намудани захираҳои зарурӣ барои татбиқи самараноки афзалиятҳои муайяншуда дар соли 2026 изҳор намуданд.