22 апрели соли 2026 муовини вазири рушди иқтисод ва савдо Нуриддинзода Аҳлиддин Нуриддин якҷо бо ҳайати расмии кишвар зери роҳбарии Вазири нақлиёти Ҷумҳурии Тоҷикистон Азим Иброҳим дар ҳошияи 82-юмин ҷаласаи Комиссияи иқтисодӣ ва иҷтимоии СММ барои Осиё ва Уқёнуси Ором (ESCAP) дар вохӯрии вазирони Барномаи махсуси СММ барои иқтисодиёти Осиёи Марказӣ (SPECA) таҳти раёсати Ҷумҳурии Қирғизистон дар шаҳри Бангкоки Шоҳигарии Таиланд баргузор гардид, иштирок ва сӯханронӣ намуд.
Нуриддинзода А. Н. қайд намуд, ки бо шарофати сиёсати хирадмандонаи Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ва сарони кишварҳои аъзои SPECA ҳамкориҳо дар ҳалли масъалаҳо вобаста ба пайвастшавии тиҷоратӣ ва рақамисозии мубодилаи маълумот дар долонҳои нақлиётии Транскаспӣ, беҳтар кардани ҳамбастагии нақлиётӣ барои робитаҳои устувори Авру-Осиё, пайвастагии энергетикӣ дар минтақа ва берун аз он, рушди савдои устувор, инноватсия ва иқтисоди даврӣ тамоюли рушдро касб намуданд.
Инчунин чорабиниҳои SPECA ҷиҳати амалисозии пешниҳодҳои глобалию минтақавии Ҷумҳурии Тоҷикистон дар самти ҳифзи пиряхҳо ва рушди зеҳни сунъӣ мусоидаткунанда арзёбӣ гардида, дар изҳороти вохӯрии вазирони SPECA бо мақсади дар сатҳи баланд баргузор намудани Конфронси чоруми байналмилалии сатҳи баланд оид ба Даҳсолаи байналмилалии амал «Об барои рушди устувор, 2018–2028» дар рӯзҳои 25 то 28 майи соли 2025 дар шаҳри Душанбе қарор қабул карда шуд.
Ҳамзамон қайд гардид, ки дар соли 2025 гардиши савдои хориҷии Ҷумҳурии Тоҷикистон бо кишварҳои аъзои SPECA 2,1 млрд. долларро ташкил дода, нисбат ба соли 2024-ум 80 млн. доллар ё 4 фоиз афзоиш ёфтааст.