28 январи соли 2026 вохӯрии вазири рушди иқтисод ва савдо Абдураҳмонзода Абдураҳмон Сафаралӣ бо Ҳамоҳангсози доимии Созмони Милали Муттаҳид (СММ) дар Ҷумҳурии Тоҷикистон хонум Парвати Рамасвами баргузор гардид.
Абдураҳмонзода А. С. қайд намуд, ки бо шарофати сиёсати хирадмандонаи Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон Тоҷикистон дар давоми 5 соли охир новобаста ба таъсири омилҳои беруна дар натиҷаи амалӣ намудани ислоҳоти иктисодӣ, барномаҳои давлатӣ ва нақшаи чорабиниҳои зиддибуҳронӣ дар самти татбиқи Ҳадафҳои Рушди Устувор (ҲРУ) ба як қатор дастовардҳои назаррас ноил гардид.
Дар вохӯрӣ ҷонибҳо ҷалби бештари маблағгузории ҳадафҳои стратегии кишвар, пешниҳоди кумаки молиявию техникӣ барои тақвият бахшидани низоми миллии мониторинг ва арзёбии раванди татбиқи ҳуҷҷатҳои банақшагирии стратегӣ, инчунин таҳияи Барномаи нави ҳамкории СММ ва Ҳукумати ҷумҳурӣ оид ба рушди устувор барои солҳои 2027–2030 мутобиқ бо Барномаи миёнамуҳлати рушди Ҷумҳурии Тоҷикистон барои солҳои 2026–2030–ро муҳокима карданд.
Дар анҷоми вохӯрӣ ҷонибҳо баргузор намудани ҷаласаи Кумитаи муштараки роҳбарикунандаи СММ ва Ҳукумати ҷумҳурӣ оид ба рушди устувор дар моҳи феврали соли 2026-ро бо мақсади ҷамъбасти натиҷаҳо ва муайян намудани афзалиятҳои стратегӣ баррасӣ намуданд.