20 январи соли 2026 дар ҳошияи «Ҳафтаи Барномаи махсуси СММ барои иқтисодиёти Осиёи Марказӣ (SPECA)», дар доираи фаъолияти Гурӯҳи кории SPECA оид ба савдо ҷаласаи канорӣ вобаста ба лоиҳаҳои пилотии марбут ба рақамикунонӣ баргузор гардид.
Муовини вазири рушди иқтисод ва савдои Ҷумҳурии Тоҷикистон Нуриддинзода Аҳлиддин ба ҳайси раиси Гурӯҳи кории SPECA оид ба савдо чорабиниро тавассути маҷозӣ ифтитоҳ намуда, дар робита ба дастовардҳо дар соли 2025 ва аҳамияти татбиқи лоиҳаҳои пилотӣ ҷиҳати содда намудани расмиёти нақлиётӣ баромад кард ва ҳамзамон мавқеи Ҷумҳурии Тоҷикистонро дар ин самт муаррифӣ намуд.
Дар чорабинӣ масъалаҳои рақамикунонии маълумоти мултимодалии роҳҳои нақлиётӣ ва соддагардонии расмиёти дигари соҳа мавриди баррасии кишварҳои иштирокчӣ қарор дода шуд.
Дар ин замина таъкид гардид, ки рақамисозии расмиёт дар долонҳои нақлиётӣ барои минтақа нақши калидӣ дошта, роҳандозии низоми самаранок ва шаффоф ба коҳиши хароҷоти тиҷоратӣ, беҳтар кардани амалиёти логистикӣ ва тақвияти устувории занҷирҳои таъминоти минтақавӣ мусоидат менамояд.
Қайд бояд кард, ки Ҷумҳурии Тоҷикистон раисии Гурӯҳи кории SPECA оид ба савдоро бар уҳда дошта, пайваста ҷаласаҳои онро роҳбарӣ менамояд.