20 январи соли 2026 дар Вазорати рушди иқтисод ва савдои Ҷумҳурии Тоҷикистон вохӯрии Вазири рушди иқтисод ва савдо Абдураҳмонзода Абдураҳмон Сафаралӣ бо Сафири Фавқулодда ва Мухтори Шоҳигарии Муттаҳидаи Британияи Кабир ва Ирландияи Шимолӣ дар Ҷумҳурии Тоҷикистон хонум Кэтрин Смиттон баргузор гардид.
Абдураҳмонзода А. С. қайд кард, ки таҳкими ҳамкориҳои иқтисодӣ бо шарикони байналмилалӣ ва ҷалби сармоягузориҳои хориҷӣ яке аз самтҳои муҳим дар сиёсати давлатии Тоҷикистон баҳисоб рафта, зери таваҷҷуҳи доимии Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон мебошад.
Дар ҷараёни мулоқот масъалаҳои ҳолати кунунӣ ва дурнамои рушди ҳамкориҳои дуҷониба дар соҳаҳои иқтисоду тиҷорат, сармоягузорӣ, иқтисоди сабз, рақамикунонӣ, маориф ва идоракунии давлатӣ мавриди баррасӣ қарор гирифтанд. Ҷонибҳо аз тамоюли мусбати рушди робитаҳои иқтисодӣ изҳори қаноатмандӣ намуда, афзоиши назарраси гардиши савдои дуҷонибаро дар соли сипаришуда ҳамчун нишондиҳандаи муҳим таъкид карданд.
Дар анҷоми вохӯрӣ ҷонибҳо бо мақсади густариши содироти маҳсулоти Тоҷикистон ба бозори Британияи Кабир истифодаи васеи имкониятҳои низоми имтиёзҳои тиҷоратии Британияи Кабир барои кишварҳои рӯ ба тараққиро қобили таваҷҷӯҳ ҳисобиданд.