7 январи соли 2026 дар Вазорати рушди иқтисод ва савдо ҷаласа оид ба шарҳу тавзеҳи Паёми Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ба Маҷлиси Олии кишвар «Дар бораи самтҳои асосии сиёсати дохилӣ ва хориҷии ҷумҳурӣ» аз 16 декабри соли 2025 ва ҳамзамон маҷлиси ҷамъбастию-интихоботии ташкилоти ибтидоии ҲХДТ «Иқтисодчӣ» баргузор гардид.
Дар кори ҷаласа вазири рушди иқтисод ва савдо Абдураҳмонзода Абдураҳмон Сафаралӣ, раиси Кумитаи иҷроияи ҲХДТ дар шаҳри Душанбе Шоҳиён Абдураҳим, раиси Кумитаи иҷроияи ҲХДТ дар ноҳияи Исмоили Сомонӣ Қурбонзода Убайдулло Маҳмадалӣ ва кормандони дастгоҳи марказӣ иштирок намуданд.
Вазири рушди иқтисод ва савдо зимни суханронӣ таъкид намуд, ки Паёми Президенти Ҷумҳурии Тоҷикистон санади муҳими стратегӣ буда, самтҳои асосии рушди устувори иқтисодию иҷтимоии кишвар, таҳкими сиёсати хориҷӣ ва баланд бардоштани сатҳу сифати зиндагии аҳолиро муайян менамояд. Қайд гардид, ки дар даҳ соли охир бо шарофати татбиқи барномаҳои давлатӣ нишондиҳандаҳои макроиқтисодӣ устувор гардида, рушди босуръати иқтисоди миллӣ таъмин шудааст.
Дар давраи қайдшуда ҳаҷми маҷмуи маҳсулоти дохилӣ 3,4 баробар афзоиш ёфта, суръати миёнасолонаи рушди иқтисоди миллӣ 7,6 фоизро ташкил намуд. Бо мақсади таъмин намудани рушди устувори иҷтимоию иқтисодии кишвар аз ҳисоби ҳамаи сарчашмаҳои маблағгузорӣ беш аз 670 миллиард сомонӣ, аз ҷумла 159 миллиард сомонӣ сармояи хориҷӣ равона карда шуд. Ҳамзамон нишондиҳандаи маҷмуи маҳсулоти дохилӣ ба ҳар сари аҳолӣ 2,7 баробар афзоиш ёфта, аз 6 ҳазор сомонӣ дар соли 2015 ба 16,4 ҳазор сомонӣ дар соли 2025 расонида шуд.
Дар ин муддат шумораи аҳолии кишвар 26 фоиз зиёд гардида, ба 10,7 миллион нафар расид, нишондиҳандаи дарозумрии аҳолӣ аз 70 ба 77 сол баланд шуд ва сатҳи камбизоатӣ то 19 фоиз коҳиш ёфт. Инчунин даромади пулии аҳолӣ беш аз шаш баробар афзоиш ёфта, соли 2025 ба 165 миллиард сомонӣ баробар гардид. Соли 2025 ҳаҷми маҷмуи маҳсулоти дохилии кишвар ба 173 миллиард сомонӣ расида, суръати рушди воқеии иқтисоди миллӣ 8,4 фоизро ташкил дод.
Абдураҳмонзода А. С. таъкид намуд, ки дар Паёми Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ба Маҷлиси Олии кишвар ба вазорату идораҳо ва мақомоти иҷроияи ҳокимияти давлатӣ супориш дода шуд, ки дар соли 2026 суръати рушди иқтисодии мамлакат на кам аз 8 фоиз таъмин гардида, дар солҳои минбаъда устувории нишондиҳандаҳои асосии макроиқтисодӣ нигоҳ дошта шавад.
Дар идома ҳисоботи фаъолияти ташкилоти ибтидоии ҲХДТ «Иқтисодчӣ» дар соли 2025 шунида шуда, фаъолияти он баҳодиҳӣ гардид. Тибқи қарорҳои қабулшуда, бо ҷонибдории якдилонаи аъзои ташкилоти ибтидоии ҳизб Абдураҳмонзода Абдураҳмон Сафаралӣ раиси ташкилоти ибтидоии ҲХДТ «Иқтисодчӣ» барои давраи минбаъда интихоб гардид ва ҳайати раёсат низ муайян карда шуд.
Дар фарҷоми ҷаласа раиси Кумитаи иҷроияи ҲХДТ дар шаҳри Душанбе Шоҳиён Абдураҳим нақши ҳизбро дар таҳкими сулҳу ваҳдат, пешрафти иҷтимоию иқтисодии кишвар ва тарбияи ҷавонон таъкид намуда, аъзои ҳизбро ба фаъолияти боз ҳам самаранок даъват кард.
Ҳамзамон дар охири ҷамъомад ба масъулин ҷиҳати иҷрои саривақтӣ ва босифати нақшаи чорабиниҳо вобаста ба татбиқи дастуру супоришҳои дар Паёми Президенти Ҷумҳурии Тоҷикистон зикршуда вазифаҳои мушаххас дода шуд.