15 декабри соли 2025 ҷаласаи навбатии маҷозии Вазири рушди иқтисод ва савдои Ҷумҳурии Тоҷикистон Абдураҳмонзода А. С. бо Вазири рушди иқтисоди Федератсияи Россия Решетников М. Г. баргузор гардид.
Зимни ҷаласа ҷонибҳо рафти иҷрои супоришҳо ва дастурҳои роҳбарони ду давлатро, ки дар доираи сафари давлатии Президенти Федератсияи Россия ба Ҷумҳурии Тоҷикистон дода шуда буданд, муфассал баррасӣ намуданд. Таваҷҷуҳи махсус ба масъалаҳои афзоиши содироти ангур ва дигар маҳсулоти кишоварзӣ аз Ҷумҳурии Тоҷикистон ба Федератсияи Россия зоҳир карда шуд.
Дар ин замина иштирокчиёни мулоқот вазъи кунунӣ ва дурнамои имзои як қатор созишномаҳо ва шартномаҳои тиҷоратиро байни ширкатҳои ду кишвар, ки ба зиёд намудани ҳаҷми содироти ангур ва дигар маҳсулоти кишоварзии Тоҷикистон ба бозори Россия равона шудаанд, мавриди муҳокима қарор доданд. Таъкид гардид, ки татбиқи ин мувофиқаҳо ба таъмини устувории таъминот, баланд бардоштани сифати маҳсулот ва васеъ намудани номгӯйи маҳсулоти содиротӣ мусоидат менамояд.
Дар натиҷаи ҷаласа ҷонибҳо қадамҳои минбаъдаро барои татбиқи амалии масъалаҳои қайдгардида мувофиқа намуда, омодагии худро ҷиҳати идомаи муколамаи созанда тасдиқ карданд.