27 ноябри соли 2025 вохӯрии Муовини вазири рушди иқтисод ва савдо Нуриддинзода Аҳлиддин Нуриддин бо ҳайати намояндагии иқтисодии Олмон дар Осиёи Марказӣ таҳти роҳбарии Эдуард Кинсбрунер баргузор гардид.
Нуриддинзода А. Н. қайд намуд, ки Ҳукумати Ҷумҳурии Тоҷикистон таҳти сиёсати хирадмандонаи Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ба рушди ҳамкориҳои тиҷоративу иқтисодӣ бо Ҷумҳурии Федеративии Олмон аҳамияти махсус медиҳад.
Дар робита ба ин бо қаноатмандӣ таъкид гардид, ки ҳамкориҳои тиҷоративу иқтисодии байни кишварҳо сол аз сол рушд карда, дар моҳҳои январ-ноябри соли 2025 гардиши мол байни кишварҳо назар ба ҳамин давраи соли 2024 36 фоиз афзоиш ёфтааст. Аммо бо назардошти захираву имкониятҳои васеи ҷонибҳо ҳаҷми ин нишондиҳанда метавонад боз ҳам баландтар карда шавад.
Дар ҷараёни вохӯрӣ Нуриддинзода А. Н. шарҳ дод, ки иқтисодиёти кишвар солҳои охир нишондодҳои устувор, аз қабили болоравии солонаи Маҷмӯи маҳсулоти дохилӣ беш аз 8 фоиз, сатҳи пасти таваррум, суботи қурби пули миллӣ ва болоравии ҳаҷми содироту воридот бо кишварҳои шарик нишон медиҳад. Таъкид карда шуд, ки чунин тамоюлҳо барои густариши фаъолиятҳои муштарак ва ҷалби сармояи хориҷӣ заминаи устувор фароҳам меоранд.
Ҷонибҳо ҳамчунин оид ба як қатор ислоҳоти иқтисодиву маъмурӣ мубодилаи назар намуданд. Аз ҷумла қайд гардид, ки соддагардонии расмиёти бақайдгирии соҳибкорӣ, рақамисозии пардохтҳои гумрукӣ, татбиқи низоми «Равзанаи ягона», коҳиши санҷишҳо дар нуқтаҳои сарҳадӣ ва дастрас будани зиёда аз 2000 хизматрасониҳои давлатӣ дар шакли электронӣ барои беҳтар намудани фазои сармоягузорӣ ва рушди бахши хусусӣ мусоидат менамояд.
Дар идомаи вохӯрӣ ҷонибҳо имкониятҳои ҳамкориро дар бахшҳои энергетика, саноат, логистика, кишоварзӣ ва иқтисоди рақамӣ мавриди баррасӣ қарор доданд. Аз ҷумла, иттилоъ дода шуд, ки Тоҷикистон дорои потенсиали бузурги гидроэнергетикӣ буда, омода аст, ҳамкориро дар самти таҷдиди шабакаҳо, зеристгоҳҳо ва истифодаи технологияҳои барқароршаванда васеъ намояд.
Ҳамзамон, таваҷҷуҳи ҷонибҳо ба рушди саноати коркард, инфрасохтори логистӣ, занҷираи «сардхона» ва рақамисозии расмиёти гумрукӣ равона гардид. Ҷониби олмонӣ зикр намуд, ки корхонаҳо ва ширкатҳои Олмон омодаанд имкониятҳои ҳамкориро дар ин бахшҳо ҳамаҷониба омӯзанд.
Инчунин, дар доираи вохӯрӣ бо намоиши видеоролик имкониятҳои сармоягузорӣ дар Минтақаҳои озоди иқтисодии Тоҷикистон муаррифӣ гардид, ки аз ҷониби олмонӣ бо таваҷҷуҳ ва истиқболи мусбӣ пазируфта шуд.
Дар анҷоми мулоқот ҷонибҳо аз омодагии худ ҷиҳати идомаи муколама ва коркарди пешниҳодҳои мушаххас изҳори қаноатмандӣ намуданд. Таваққуф дар он шуд, ки идома ёфтани чунин мулоқотҳо барои таҳкими робитаҳои иқтисодиву тиҷоратӣ мусоидат хоҳад кард.