11–12 ноябри соли 2025 дар шаҳри Мински Ҷумҳурии Беларус дар парки технологии шаҳри Минск Конфренсияи III байналмилалии илмӣ-амалӣ таҳти унвони «Донишгоҳҳо – марказҳои нави ҷалби илм, тиҷорат ва ҷомеа» баргузор гардид.
Бо сухани ифтитоҳӣ ба иштирокчиёни конфренсия муовини Вазири рушди иқтисод ва савдои Ҷумҳурии Тоҷикистон Насриддинзода Рухшона Ҳикматулло муроҷиат намуда, таъкид кард, ки рушди экосистемаи инноватсионӣ ва ҳамкории самарабахш миёни донишгоҳҳо, марказҳои илмӣ ва бахши хусусӣ омили муҳимми рушди устувори иқтисодиёти кишварҳои ИДМ мебошад.
Қайд гардид, ки Ҷумҳурии Тоҷикистон ба татбиқи Барномаи байнидавлатии ҳамкории инноватсионии давлатҳои иштирокдори Иттиҳоди Давлатҳои Мустақил барои давраи то соли 2030 аҳамияти хосса медиҳад, ки ҳадафи он ташаккули фазои ягонаи илмӣ ва технологӣ ва баланд бардоштани рақобатпазирии иқтисодиёти кишварҳои узви Иттиҳод мебошад.
Ҳамчунин зикр гардид, ки масъалаи тиҷоратӣ намудани натиҷаҳои корҳои илмӣ-тадқиқотӣ ва конструктории таҷрибавӣ (НИОКР) яке аз самтҳои муҳим боқӣ мемонад. Дар ин замина, як қатор мушкилот ва дурнамоҳои ҳамкорӣ дар доираи кишварҳои ИДМ мавриди баррасӣ қарор гирифтанд, аз ҷумла зарурати таҳкими механизмҳои дастгирии инноватсияҳо, ҷалби бештари бахши хусусӣ ва рушди лоиҳаҳои муштараки таҳқиқотии байнимарзӣ.
Қайд гардид, ки баргузории чунин чорабиниҳои байналмилалӣ ба мубодилаи таҷриба, густариши робитаҳои ҳамкорӣ ва татбиқи амалӣ намудани ташаббусҳои муштарак дар соҳаи илм, технология ва инноватсия мусоидат менамояд.