27-28 октябри соли 2025 дар доираи лоиҳаи «Содагардонии расмиёти савдо дар Осиёи Марказӣ» 14-умин ҷаласаи минтақавии Кумитаҳои миллии ҳамоҳангсози содагардонии расмиёти савдои кишварҳои Осиёи Марказӣ бо иштироки роҳбарият ва узви Кумитаҳои миллии ҷумҳуриҳои Қазоқистон, Қирғизистон, Туркманистон ва Узбекистон, бахши хусусӣ ва шарикони рушд дар шаҳри Душанбе ҷараён дорад. Чорабинӣ аз ҷониби Вазорати рушди иқтисод ва савдо бо дастгирии Ҷамъияти ҳамкориҳои байналмилалии Олмон (GIZ) баргузор гардид.
Кори ҷаласаи мазкур бо сухани ифтитоҳии Муовини якуми Вазири рушди иқтисод ва савдо Солеҳзода А. А. оғоз гардида, қайд карда шуд, ки бо шарофати сиёсати хирадмандонаи сарони давлатҳо ҳамкориҳои кишварҳои Осиёи Марказӣ дар доираи ҷаласаҳои Кумитаҳои миллии ҳамоҳангсози содагардонии расмиёти савдо ба сатҳи сифатан нав баромадааст.
Сипас Солеҳзода А. А. қайд намуд, ки дар доираи дастуру супоришҳои Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон Ҷумҳурии Тоҷикистон ба густариш ва тақвияти ҳамкориҳои минтақавӣ ҷиҳати таҳкими ҳамгироии нақлиётӣ-коммуникатсионӣ бо кишварҳои Осиёи Марказӣ, рақамикунонӣ ва содагардонии расмиёти савдои минтақавию байналмилалӣ, инчунин таъсиси марказҳои логистикӣ таваҷҷуҳи аввалиндараҷа медиҳад.
Инчунин қайд гардид, ки дар 9 моҳи соли ҷорӣ новобаста аз вазъияти мураккаби геосиёсию геоиқтисодии ҷаҳони имрӯза, Тоҷикистон ба таъмини устувории нишондиҳандаҳои макроиқтисодӣ, афзоиши гардиши савдои хориҷӣ ва содагардонии расмиёти савдо ба дастовардҳои назаррас ноил шудааст.
Дар рафти ҷаласа бо мақсади тақвияти ҳамкориҳои минбаъда Солеҳзода А. А. таваҷҷуҳи иштирокдорони ҷаласаро ба масъалаҳои тақвияти ҳамгироии минтақавӣ дар доираи Созмони Умумиҷаҳонии Савдо, тақвияти фаъолияти Равзанаи ягонаи кишварҳои минтақавӣ бо мақсади содагардонии савдои байнисарҳадӣ, бартарафсозии монеаҳо ҷиҳати рушди соҳибкории хурду миёна ва мубодилаи электронии маълумотҳо барои татбиқи долонҳои иқтисодӣ даъват намуд.
Дар ифтитоҳи ҷаласа директори кишварии GIZ хонум Сабина Олтхоф ва менеҷери лоиҳа Юдит Бланк суханронӣ намуданд.
Ҳамзамон дар рафти ҷаласаи қайдгардида аз ҷониби сардори Раёсати ҳамкориҳо бо Созмони Умумиҷаҳонии Савдои Сарраёсати сиёсати савдо ва бозори истеъмолии вазорат Умедҷони Давлат доир ба фаъолияти Кумитаи ҳамоҳангсозии содагардонии расмиёти савдои Ҷумҳурии Тоҷикистон рӯнамо пешниҳод гардид.
Аз ҷониби масъулини Кумитаҳои миллии кишварҳои Осиёи Марказӣ низ дар самти фаъолияти худ мубодилаи таҷриба сурат гирифт.
Кори ҷаласа 28 октябри соли 2025 низ идома меёбад.