20 октябри соли 2025 дар Вазорати рушди иқтисод ва савдои Ҷумҳурии Тоҷикистон бо иштироки муовини якуми Вазири рушди иқтисод ва савдо Солеҳзода Ашурбой Абдувоҳид, муовини Раиси шаҳри Душанбе Абдураҳмонзода Абдураҳмон Сафаралӣ, намояндагони вазорату идораҳо, шарикони рушд ва коршиносони соҳавӣ ҷаласа оид ба муаррифӣ ва баррасии лоиҳаи Барномаи рушди иқтисодию иҷтимоии шаҳри Душанбе барои солҳои 2026-2030 (БРИИ ш. Душанбе 2026-2030) баргузор гардид.
Солеҳзода А. А. ҷаласаро оғоз карда, вобаста ба дастуру супоришҳои Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон оиди амалишавии ҳадафу афзалиятҳои кишвар суханронӣ намуда, зарурати тақвияти ҳамкориҳо бо ҷонибҳои дахлдорро ҷиҳати такмили лоиҳаи Барномаи мазкур таъкид намуд.
Сипас Абдураҳмонзода А. С. оид ба лоиҳаи БРИИ шаҳри Душанбе 2026-2030 суханронӣ намуд, ки дар он ҳадафу афзалиятҳои рушд, аз ҷумла рақамикунонӣ, зеҳни сунъӣ, рушди иқтисодӣ дар асоси навоварӣ, рушди сармояи инсонӣ ва дигар самтҳо мавриди таваҷҷуҳи махсус қарор гирифтанд.
Қисми муҳими мизи мудаввар ба муҳокима ва пешниҳодҳои созанда оид ба лоиҳаи Барнома бо иштироки фаъоли намояндагони вазорату идораҳо, ташкилоти байналмилалӣ - аъзои Шӯрои ҳамоҳангсози шарикони рушд, коршиносони миллӣ ва дигар ҷонибҳои дахлдор бахшида шуд. Аз ҷониби Солеҳзода А. А. ва Абдураҳмонзода А. С. ба саволҳо ва масъалаҳои матраҳшуда посухҳои муфассал дода шуданд.
Дар анҷоми ҷаласа фикру пешниҳодҳо ва натиҷаи муҳокимаҳо ҷамъбаст гардида, қадамҳои минбаъдаи таҳияи лоиҳаи ниҳоии БРИИ шаҳри Душанбе 2026-2030 ва Нақшаи чорабиниҳои амалӣ гардидани он муайян карда шуданд.
Ба иштирокчиён барои саҳмгузории арзишманд ва ширкати фаъолона изҳори сипос баён гардид.