6 сентябри соли 2025 ҷаласаи 24-уми вазирони иқтисод ва савдои давлатҳои иштирокдори Созмони Ҳамкории Шанхай (СҲШ) дар шаҳри Владивостоки Федератсияи Россия баргузор гардид, ки дар он Вазири рушди иқтисод ва савдои Ҷумҳурии Тоҷикистон Завқизода Завқӣ Амин тариқи видеоконфронс иштирок ва суханронӣ намуд.
Дар оғози суханронӣ Завқизода З. А. ба Ҳукумати Федератсияи Россия ҷиҳати ташкил ва баргузории ҷаласаи мазкур изҳори сипос намуда, қайд кард, ки бо шарофати сиёсати хирадмандона ва дурбинонани Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ва талошҳои роҳбарони кишварҳои иштирокдори СҲШ имрӯз заминаи мустаҳками ҳамкорӣ фароҳам оварда шудааст.
Инчунин аҳамияти минбарҳои СҲШ барои тавсеаи ҳамкориҳо дар соҳаҳои иқтисоду тиҷорат, саноат, энергетика, нақлиёт ва рақамикунонӣ таъкид гардида, қайд карда шуд, ки зиёда аз 70 фоизи гардиши савдои хориҷии Тоҷикистон ба кишварҳои иштирокдори СҲШ рост меояд.
Завқизода З. А. фаъолтар намудани раванди татбиқи Нақшаи чорабиниҳо оид ба амалигардондани Стратегияи рушди иқтисоди СҲШ то соли 2030-ро, ки бо пешниҳоди Ҷумҳурии Тоҷикистон таҳия ва қабул шудааст, таъкид кард. Ҳамзамон пешниҳод гардид, ки ба рушди иқтисоди рақамӣ, савдои электронӣ, технологияҳои иттилоотию коммуникатсионӣ, зеҳни сунъӣ ва кооператсияи саноати таваҷҷуҳи бештар дода шавад. Пешниҳодҳои мазкур аз ҷониби иштирокчиёни чорабинӣ бо хушнудӣ пазируфта шуданд.
Дар идомаи ҷаласа қайд гардид, ки мувофиқи тартиб ҷаласаи минбаъдаи вазирони иқтисод ва савдои давлатҳои иштирокдори СҲШ соли 2026 дар шаҳри Душанбе баргузор хоҳад шуд. Дар бораи сана ва ҷузъиёти ташкилии он иттилоот тавассути роҳҳои дипломатӣ пешниҳод мегардад.
Дар анҷоми ҷаласа Завқизода З. А. омодагии Ҷумҳурии Тоҷикистонро ҷиҳати таҳкими ҳамкорӣ дар доираи СҲШ ва татбиқи лоиҳаҳои муштарак дар самтҳои афзалиятнок иброз намуд.