4 сентябри соли 2025 дар Вазорати рушди иқтисод ва савдо бо иштироки Ёрдамчии Президенти Ҷумҳурии Тоҷикистон оид ба масъалаҳои иқтисодӣ, роҳбарият, кормандони дастгоҳи марказӣ ва зерсохторҳои вазорат ба ифтихори ҷашни 34-умин солгарди Истиқлоли давлатии Ҷумҳурии Тоҷикистон ҷамъомади тантанавӣ баргузор гардид.
Дар оғози ҷамъомад Завқизода З. А. ҳозиринро бо фарорасии ҷашни фархунда - Истиқлоли давлатӣ самимона табрику таҳният намуда, қайд кард, ки ҳамаи дастовардҳои давраи соҳибистиқлолӣ, ваҳдату амнияти миллӣ ва ободу зебо гардидани кишвар маҳз ба азму иродаи қавӣ ва талошҳои шабонарӯзии Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон алоқамандии бевосита дошта, давлати мо дар самти рушди устувор ва таъмини зиндагии арзандаи мардуми Тоҷикистони маҳбубамон ба комёбиҳои назаррас ноил гардид.
Аз ҷумла новобаста аз таъсири омилҳои берунӣ дар натиҷаи татбиқи бомароми стратегияву барномаҳои давлатӣ танҳо дар 25 соли давраи Истиқлоли давлатӣ маҷмӯи маҳсулоти дохилӣ аз 1,8 млрд. сомонӣ то 153,4 млрд. сомонӣ ё 85 маротиба, маҷмӯи маҳсулоти дохилӣ ба ҳар нафар аҳолӣ аз 289 сомонӣ то 14,8 ҳазор сомонӣ ё 51 маротиба, даромадҳои пулии аҳолӣ аз 1 млрд. сомонӣ то 147 млрд. сомонӣ ё 147 маротиба, ҳаҷми истеҳсоли маҳсулоти саноатӣ аз 1,4 млрд. сомонӣ то 53,8 млрд. сомонӣ ё 38 маротиба ва ҳаҷми содирот аз 784 млн. доллар то 1947 млн. доллар ё 2,5 маротиба зиёд гардиданд. Дар даврони соҳибистиқлолӣ сатҳи камбизоатӣ аз 83 фоиз то 20,4 фоиз коҳиш ёфта, зиёда аз 2550 км роҳҳо ва беш аз 2 ҳазор мегаватт иқтидорҳои нави энергетикӣ, бахусус 2 агрегати НБО “Роғун”, 3670 адад муассисаҳои нави таълимӣ, 3076 адад муассисаҳои нави тиббӣ сохта ба истифода дода шуданд.
Дар натиҷа ташкилотҳои байналмилалии молиявӣ Тоҷикистонро ҳамчун кишвари дорои суръати баланди рушди иқтисодӣ арзёбӣ намуданд. Зеро дар 20 соли охир аввалин маротиба дар 5 солаи охир рушди иқтисодӣ дар сатҳи балантар аз 8 фоиз таъмин гардид.
Мавриди қайд аст, ки сарфи назар аз таъсири ду буҳрони шадиди иқтисоди глобалӣ дар 5 соли охир ҳаҷми маҷмӯи маҳсулоти дохилии кишвар 74,3 млрд. сомонӣ ё 2,2 маротиба афзоиш ёфт, ки дар соли 2024 153,4 млрд. сомониро ташкил дод. Дар ин давра суръати рушди иқтисоди миллӣ ба ҳисоби миёна 7,7 фоиз (8,5 фоиз бе назардошти соли 2020 – соли паҳншавии пандемияи КОВИД-19) таъмин гардид, ки нисбат ба 5 соли қаблӣ (2015-2019) 0,7 (1,5) банди фоизӣ баланд аст.
Дар нимсолаи якуми соли 2025 низ устувории нишондиҳандаҳои макроиқтисодӣ таъмин гардида, ҳаҷми маҷмӯи маҳсулоти дохилӣ 70,8 млрд. сомонӣ ва суръати рушди воқеии он 8,1 фоизро ташкил дод.
Суръати рушди иқтисоди миллӣ дар нимсолаи якуми соли 2025 асосан аз ҳисоби зиёд гардидани ҳаҷми истеҳсоли маҳсулоти саноатӣ 24 фоиз, маблағгузорӣ ба сармояи асосӣ 14,6 фоиз, хизматрасонии пулакӣ 12,8 фоиз, кишоварзӣ 9,7 фоиз, боркашонӣ 9,3 фоиз, гардиши савдо 9 фоиз ва мусофиркашонӣ 5,8 фоиз таъмин гардид.
Дар идомаи ҷамъомад Завқизода З. А. ба кормандони вазорат дастур дод, ки зиракии сиёсиву амниятиро аз даст надода, доимо барои ҳифз ва тақвият додани дастовардҳои Истиқлоли давлатӣ, бахусус таъмини устувории нишондиҳандаҳои макроиқтисодӣ ва иҷрои вазифаҳои мансабӣ дар фаъолияти кориву шахсии худ аз пештара бештар талош намоянд.
Дар анҷоми чорабинӣ аз ҷониби Ёрдамчии Президенти Ҷумҳурии Тоҷикистон оид ба масъалаҳои иқтисодӣ Ҳикматуллозода Н. Ҳ. ва Вазири рушди иқтисод ва савдо Завқизода З. А. ба як қатор кормандони вазорат ва муассисаҳои зертобеъ барои фаъолияти самаранок ва саҳми арзанда дар рушди иқтисодию иҷтимоии кишвар мукофотҳои давлатӣ ва ифтихорномаи вазорат тақдим гардиданд.
Аз ҷумла Одиназода Моҳтоббӣ Сайдалӣ муовини сардори Раёсат-сардори Шуъбаи рушди соҳаҳои иҷтимоии Раёсати рушди соҳаҳои иҷтимоии вазорат бо медали Хизмати шоиста сарфароз гардонида шуд.