11 июли соли 2025 дар шаҳри Тянзини Ҷумҳурии Мардумии Чин маросими ифтитоҳи расмии Форуми иқтисоди рақамии Созмони Ҳамкории Шанхай (СҲШ) 2025 бо иштироки намояндагони воломақоми кишварҳои аъзои СҲШ баргузор гардид, ки дар он ҳайати Ҷумҳурии Тоҷикистон таҳти роҳбарии Вазири рушди иқтисод ва савдо Завқизода Завқӣ Амин иштирок ва суханронӣ намуд.
Дар суханронии маросими ифтитоҳӣ Завқизода З. А. ба Ҳукумати Ҷумҳурии Мардумии Чин барои ташкили чунин Форуми сатҳи баланд ва муҳайё намудани фазои созанда барои табодули таҷриба ва таҳкими робитаҳо изҳори сипос намуда, изҳор дошт, ки чунин чорабинӣ ҳамчун як платформаи муҳими ҳамгироӣ ва тақвияти муносибатҳои минтақавӣ барои кишварҳои аъзо аҳамияти баланди стратегӣ дорад.
Завқизода З. А. қайд намуд, ки бо шарофати сиёсати хирадмандонаи Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ва талошҳои роҳбарони кишварҳои аъзои СҲШ имрӯз заминаи мустаҳками ҳамкорӣ, эътимоди тарафайн ва платформаҳои муҳими ҳамгироӣ фароҳам оварда шудаанд, ки ба тавсеаи робитаҳои иқтисодӣ, рақамӣ ва сармоягузорӣ миёни кишварҳои минтақа заминаи мусоид фароҳам оварданд.
Дар Форум дастовардҳои кишвар дар самти рақамикунонӣ, аз ҷумла қабули Консепсияи иқтисоди рақамӣ, Барномаи миёнамуҳлати рушди иқтисоди рақамӣ барои солҳои 2021–2025, Стратегияи рушди зеҳни сунъӣ барои давраи то соли 2040, Қонуни Ҷумҳурии Тоҷикистон «Дар бораи ҳуҷҷати электронӣ ва имзои электронӣ» ва Қонуни Ҷумҳурии Тоҷикистон «Дар бораи савдои электронӣ» муаррифӣ гардид.
Қайд гардид, ки дар натиҷаи татбиқи санадҳои қайдшуда, Тоҷикистон то ин давра якчанд корҳои назаррасро ба анҷом расонидааст, аз ҷумла таъсиси стартапҳои рақамӣ (zypl.ai), портали савдои электронӣ (Tajtrade), рақамикунонии якчанд соҳаҳои афзалиятнок, бахусус низоми дурнамосозӣ, низоми иҷозатдиҳии соҳаи саноат, бақайдгирии соҳибкорӣ, нақлиёт, энергетика, хизматрасониҳои бонкӣ, пардохтҳои андозӣ, маориф, тандурустӣ, муносибатҳои хориҷӣ ва дар шаҳри Душанбе дар доираи низоми «Шаҳри ҳушманд» рақамикунонии барномавии самти мусофиркашонӣ, маориф (E-Donish), тандурустӣ (E-Tib), шаҳри бехатар ва назорати таваққуфгоҳҳо (City Parking) мебошанд.
Дар анҷоми Форум Завқизода З. А. омодагии Ҷумҳурии Тоҷикистонро ҷиҳати таҳкими ҳамкорӣ дар доираи СҲШ ва татбиқи лоиҳаҳо дар самтҳои афзалиятноки иқтисоди рақамӣ иброз намуд.